ایران نے امریکا مذاکرات کیلئے نئی تجاویز پاکستان کو دے دیں، رضا امیری مقدم کی تصدیق

(اسلام آباد)رضا امیری مقدم نے تصدیق کی ہے کہ ایران نے امریکا سے مذاکرات کیلئے اپنی نئی تجاویز پاکستان کے حوالے کر دی ہیں۔

ایرانی نیوز ایجنسی کو انٹرویو دیتے ہوئے انہوں نے کہا کہ تہران کی مذاکراتی پیشکش کا مقصد مسلط کردہ جنگ کا مستقل خاتمہ ہے اور موجودہ سفارتی عمل میں پاکستان واحد اور مرکزی ثالث کا کردار ادا کر رہا ہے۔

رضا امیری مقدم نے کہا کہ ایران اپنے مؤقف اور مطالبات پر پہلے کی طرح قائم ہے اور قومی مفادات، خودمختاری اور دفاع پر کسی قسم کا سمجھوتہ نہیں کرے گا۔

انہوں نے واضح کیا کہ مذاکرات میں پیشرفت مکمل طور پر امریکی رویے پر منحصر ہے۔ اگر امریکا سنجیدہ ہے تو اسے اپنا رویہ تبدیل کرنا ہوگا، جارحانہ طرزِ عمل ترک کرنا ہوگا اور ایران کے جائز حقوق کا احترام کرنا ہوگا۔

ایرانی سفیر کا کہنا تھا کہ جنگ کے خاتمے کیلئے نیا مذاکراتی منصوبہ پاکستان کے ذریعے امریکا تک پہنچا دیا گیا ہے، جبکہ پاکستان کی سفارتی کوششیں قابلِ قدر اور قابلِ تحسین ہیں۔

رضا امیری مقدم نے مزید کہا کہ پاکستان اور ایران کے درمیان سیاسی، اقتصادی اور تجارتی روابط میں مسلسل اضافہ ہو رہا ہے، جبکہ میرجاوہ، تفتان اور گبد ریمدان بارڈر کراسنگز پاک ایران تجارت کیلئے انتہائی اہم ہیں۔