ایرانی پاسداران انقلاب نے ٹرمپ کا معاہدے پر آج دستخط کا دعویٰ مسترد کر دیا

ایرانی پاسداران انقلاب فورس نے امریکی صدر ڈونلڈ ٹرمپ کے اس دعوے کو مسترد کر دیا ہے جس میں انہوں نے کہا تھا کہ ایران اور امریکہ کے درمیان اتوار کے روز ایک معاہدے پر دستخط کیے جائیں گے۔

پاسداران انقلاب کی جانب سے جاری بیان میں کہا گیا ہے کہ ایرانی مذاکرات کار پہلے ہی واضح کر چکے ہیں کہ اتوار کو کسی بھی معاہدے پر دستخط نہیں کیے جائیں گے۔ بیان کے مطابق ایران کی جانب سے ایسی کسی تقریب یا معاہدے کی توثیق نہیں کی گئی۔

ایرانی فوج کے مطابق صدر ٹرمپ معاہدے پر دستخط کی تقریب اپنی سالگرہ کے موقع پر 14 جون کو منعقد کرنا چاہتے ہیں۔ پاسداران انقلاب نے دعویٰ کیا کہ امریکی صدر اس موقع کو علامتی اہمیت دے کر اپنی ذاتی تشہیر کے لیے استعمال کرنا چاہتے ہیں۔

دوسری جانب صدر ڈونلڈ ٹرمپ نے اپنے بیان میں کہا تھا کہ ایران کے ساتھ معاہدے پر اتوار کو دستخط ہوں گے اور دستخط کے فوراً بعد آبنائے ہرمز کو کھول دیا جائے گا۔ انہوں نے مزید کہا کہ اس معاہدے کے بعد دونوں ممالک کے تعلقات پہلے سے بہتر ہوں گے اور معاہدے میں کسی قسم کی مالی ادائیگی یا رقم کا تبادلہ شامل نہیں ہوگا۔

ادھر پاکستان کے وزیراعظم شہباز شریف نے بھی سوشل میڈیا پلیٹ فارم ایکس پر جاری اپنے بیان میں امید ظاہر کی تھی کہ آئندہ 24 گھنٹوں کے دوران امریکہ اور ایران کے درمیان امن معاہدے کو حتمی شکل دے دی جائے گی۔ انہوں نے مذاکراتی عمل میں تعاون پر دونوں ممالک کا شکریہ بھی ادا کیا۔

ایران اور امریکہ کے درمیان ممکنہ معاہدے کے حوالے سے متضاد بیانات سامنے آنے کے بعد عالمی سطح پر اس پیش رفت پر گہری نظر رکھی جا رہی ہے، جبکہ دونوں ممالک کی جانب سے کسی حتمی اعلان کا انتظار کیا جا رہا ہے۔