ایرانی سپریم لیڈر: قومی سلامتی کونسل کی سفارش پر امریکا ایران معاہدے کی منظوری دی

تہران: ایرانی سپریم لیڈر مجتبیٰ خامنہ ای نے کہا ہے کہ قومی سلامتی کونسل کی سفارش پر امریکا اور ایران کے درمیان مفاہمتی یادداشت کی منظوری دی گئی، جس کے بعد دونوں ممالک کے درمیان معاہدے پر دستخط ممکن ہوئے۔

ایرانی عوام کے نام اپنے پیغام میں مجتبیٰ خامنہ ای نے کہا کہ اس مرحلے تک پہنچنے کے لیے ایرانی حکام نے نیک نیتی اور ذمہ داری کے ساتھ بھرپور کوششیں کیں۔ انہوں نے مزید کہا کہ امریکی صدر نے بھی مختلف سفارتی ذرائع اور رابطوں کے ذریعے معاہدے کو ممکن بنانے کے لیے اقدامات کیے۔

سپریم لیڈر کے مطابق معاہدے کے حوالے سے ان کی ذاتی رائے بعض معاملات میں مختلف تھی، تاہم ایرانی صدر نے انہیں یقین دہانی کرائی کہ مذاکرات اور معاہدے کے دوران ایرانی قوم کے حقوق، خودمختاری اور قومی مفادات کا مکمل تحفظ کیا جائے گا۔

انہوں نے کہا کہ ایرانی صدر نے یہ بھی وعدہ کیا کہ امریکا کے ایسے مطالبات ہرگز قبول نہیں کیے جائیں گے جو ایران کی قومی پالیسی یا خودمختاری سے متصادم ہوں۔ صدر کی جانب سے مکمل ذمہ داری قبول کرنے کے عہد کے بعد معاہدے کی منظوری دی گئی۔

مجتبیٰ خامنہ ای نے کہا کہ اب ایران معاہدے میں طے شدہ شرائط کے عملی نفاذ اور اس کے نتائج کا انتظار کرے گا، جبکہ تمام متعلقہ ادارے معاہدے پر عملدرآمد کے عمل کا جائزہ لیتے رہیں گے۔

انہوں نے اس امید کا اظہار کیا کہ معاہدے کے تحت طے پانے والے اقدامات خطے میں استحکام، کشیدگی میں کمی اور ایران کے قومی مفادات کے تحفظ میں معاون ثابت ہوں گے۔