فیفا نے ایران کا ورلڈ کپ کیمپ امریکہ سے میکسیکو منتقل کرنے کی درخواست منظور کر لی

(نیویارک) فیفا نے ایران کی جانب سے فٹبال ورلڈ کپ سے قبل اپنے قومی ٹیم کے بیس کیمپ کو امریکہ کے بجائے میکسیکو منتقل کرنے کی درخواست منظور کر لی ہے۔

ایرانی فٹبال فیڈریشن کے سربراہ مہدی تاج کے مطابق قومی ٹیم اب اپنی تیاریاں میکسیکو کے شہر تیخوانا میں کرے گی، جو بحرالکاہل کے قریب اور امریکی سرحد سے متصل واقع ہے۔

ایرانی سرکاری خبر رساں ادارے ارنا کے مطابق مہدی تاج نے تصدیق کی کہ فیفا نے باضابطہ طور پر کیمپ کا مقام امریکہ سے میکسیکو منتقل کرنے کی منظوری دے دی ہے۔

واضح رہے کہ فیفا ورلڈ کپ 2026 آئندہ سال 11 جون سے 19 جولائی تک امریکہ، کینیڈا اور میکسیکو کی مشترکہ میزبانی میں کھیلا جائے گا۔

ایرانی حکام کے مطابق گزشتہ کئی ماہ سے ٹیم کو سفری اور سکیورٹی انتظامات کے حوالے سے غیر یقینی صورتحال کا سامنا تھا۔ حکام کا کہنا ہے کہ رواں ماہ تک بھی ایرانی کھلاڑیوں اور آفیشلز کو امریکہ کے ویزے جاری نہیں کیے گئے تھے، حالانکہ عالمی کپ کے آغاز میں ایک ماہ سے بھی کم وقت باقی تھا۔

ایرانی فٹبال حکام کا ماننا ہے کہ میکسیکو منتقل ہونے سے ٹیم کو بہتر تیاری، کم سفری مسائل اور نسبتاً زیادہ سازگار ماحول میسر آئے گا۔