امریکا مفاہمت اختیار کرے، معاہدے کیلئے موجودہ صورتحال بہترین ہے: ایرانی صدر

تہران:ایران کے صدر مسعود پزشکیان نے کہا ہے کہ مذاکرات اور سفارتکاری نے امریکا کو ایران کے ساتھ مفاہمت اختیار کرنے پر مجبور کیا ہے، جبکہ معاہدے تک پہنچنے کے لیے موجودہ صورتحال بہترین وقت ہے۔

تہران میں نیوز کانفرنس کرتے ہوئے مسعود پزشکیان نے کہا کہ اسلام آباد مفاہمتی یادداشت کے تحت امریکا کے لیے ضروری تھا کہ وہ ایران اور عمان کی جانب سے تیار کردہ گائیڈ لائنز پر عمل کرے، تاہم امریکا نے ایسا نہیں کیا، جس کے نتیجے میں ایران کو ردعمل دینا پڑا۔

ایرانی صدر کے مطابق ایسی صورتحال سے نمٹنے کے لیے عموماً ایک خصوصی ٹیم کی ضرورت ہوتی ہے تاکہ معاہدے کی خلاف ورزیوں کا جائزہ لے کر مناسب اقدامات کیے جا سکیں۔ انہوں نے کہا کہ ایران وقار اور قومی فخر کے ساتھ آگے بڑھتا رہے گا۔

مسعود پزشکیان نے امریکا کو مجرم اور استعماری حکومت قرار دیتے ہوئے کہا کہ امریکا کے حوالے سے ایران کے مؤقف میں کوئی تبدیلی نہیں آئی۔ ان کا کہنا تھا کہ امریکا اور اسرائیل بھی جانتے ہیں کہ صرف جنگ کے ذریعے ایرانی عوام کو اپنے مطالبات ماننے پر مجبور نہیں کیا جا سکتا۔

انہوں نے مزید کہا کہ مخالف قوتیں اپنے مقاصد کے حصول کے لیے داخلی تقسیم، اختلافات اور تنازعات کو بطور حربہ استعمال کر سکتی ہیں۔

ایرانی صدر نے قومی اتحاد اور مزاحمت کو ملک کی سلامتی اور دفاعی صلاحیتوں کے تحفظ کے لیے ناگزیر قرار دیتے ہوئے ایرانی عوام پر زور دیا کہ وہ استقامت اور مزاحمت کا سلسلہ جاری رکھیں۔