اسحاق ڈار کا ایرانی وزیر خارجہ عباس عراقچی سے رابطہ، کشیدگی کم کرنے اور سفارتکاری پر زور

(اسلام آباد) نائب وزیراعظم و وزیر خارجہ اسحاق ڈار نے ایرانی وزیر خارجہ عباس عراقچی سے ٹیلیفون پر رابطہ کیا، جس میں خطے کی موجودہ صورتحال، کشیدگی میں کمی اور امن کے قیام کے لیے سفارتی کوششوں پر تبادلہ خیال کیا گیا۔

ترجمان دفتر خارجہ کے مطابق گفتگو کے دوران اسحاق ڈار نے تمام فریقوں پر زور دیا کہ وہ اسلام آباد مفاہمتی یادداشت (ایم او یو) کے تحت تحمل کا مظاہرہ کریں اور کشیدگی کم کرنے کے لیے عملی اقدامات کریں۔

انہوں نے کہا کہ موجودہ تنازعات کا واحد قابلِ عمل حل مذاکرات اور سفارتکاری ہے، جبکہ خطے میں پائیدار امن، استحکام اور سلامتی کے لیے بھی بات چیت ہی مؤثر راستہ ثابت ہو سکتی ہے۔

ترجمان کے مطابق نائب وزیراعظم نے اس عزم کا اعادہ کیا کہ پاکستان خطے میں امن، استحکام اور کشیدگی میں کمی کے لیے اپنا مثبت اور تعمیری کردار جاری رکھے گا۔

گفتگو کے اختتام پر دونوں وزرائے خارجہ نے باہمی رابطے برقرار رکھنے اور خطے کی بدلتی ہوئی صورتحال پر مسلسل مشاورت جاری رکھنے پر اتفاق کیا۔