وزیر خارجہ اسحاق ڈار کا سعودی ہم منصب سے رابطہ، مشرق وسطیٰ میں کشیدگی کم کرنے پر زور

(اسلام آباد) ترجمان دفتر خارجہ کے مطابق دونوں رہنماؤں نے حالیہ علاقائی پیش رفت کا تفصیلی جائزہ لیا اور خطے میں کشیدگی کم کرنے کی فوری ضرورت پر زور دیا۔ گفتگو کے دوران اس بات پر اتفاق کیا گیا کہ موجودہ صورتحال میں قریبی رابطے برقرار رکھنا انتہائی ضروری ہے تاکہ خطے میں امن و استحکام کو یقینی بنایا جا سکے۔

دفتر خارجہ کے مطابق پاکستان اور سعودی عرب نے مشرق وسطیٰ میں امن، استحکام اور سفارتی کوششوں کے فروغ کیلئے مشترکہ اقدامات جاری رکھنے پر بھی اتفاق کیا۔

دوسری جانب چین اور روس کے درمیان بھی مشرق وسطیٰ کی صورتحال پر اہم رابطہ ہوا۔ چینی وزیر خارجہ وانگ یی نے روسی ہم منصب سے ٹیلیفونک گفتگو میں آبنائے ہرمز اور خطے میں جاری کشیدگی پر تبادلہ خیال کیا۔

چینی وزیر خارجہ نے کہا کہ آبنائے ہرمز میں صورتحال کی بحالی صرف فوری جنگ بندی سے ہی ممکن ہے۔ انہوں نے مزید کہا کہ چین ہمیشہ عالمی تنازعات کے حل کیلئے مذاکرات اور مفاہمت کی حمایت کرتا رہا ہے اور تمام فریقین سے تحمل کا مظاہرہ کرنے کی اپیل کی۔

ماہرین کے مطابق پاکستان، سعودی عرب، چین اور روس کے درمیان سفارتی رابطوں میں تیزی خطے میں ممکنہ کشیدگی کم کرنے کی کوششوں کا حصہ ہے۔