پاکستان ثالثی جاری رکھے گا، ایران اور امریکہ سے جنگ بندی کے عزم کو برقرار رکھنے کی اپیل: اسحاق ڈار

(اسلام آباد)اتوار کی صبح اسلام آباد میں پریس کانفرنس سے خطاب کرتے ہوئے اسحاق ڈار نے کہا کہ پاکستان ایران اور امریکہ کا شکر گزار ہے کہ انہوں نے وزیرِ اعظم شہباز شریف کی جانب سے جنگ بندی کی درخواست کو نہ صرف قبول کیا بلکہ مذاکرات کے لیے اسلام آباد آنے پر بھی آمادگی ظاہر کی۔

انہوں نے بتایا کہ امریکی نائب صدر جے ڈی وینس اور ایرانی پارلیمان کے سپیکر محمد باقر قالیباف کی سربراہی میں دونوں ممالک کے اعلیٰ سطحی وفود مذاکرات میں شرکت کے لیے پاکستان پہنچے۔

اسحاق ڈار کا کہنا تھا کہ "میں نے اور آرمی چیف فیلڈ مارشل عاصم منیر نے دونوں فریقین کے درمیان مشکل لیکن تعمیری مذاکرات کے متعدد ادوار میں ثالثی کی، جو آج صبح تک جاری رہے۔"

نائب وزیرِ اعظم نے امید ظاہر کی کہ دونوں ممالک مثبت انداز میں مذاکراتی عمل کو جاری رکھیں گے تاکہ خطے میں دیرپا امن اور استحکام کو یقینی بنایا جا سکے۔

انہوں نے مزید کہا کہ "یہ انتہائی اہم ہے کہ دونوں فریق جنگ بندی کے لیے اپنے عزم کو برقرار رکھیں تاکہ نہ صرف خطے بلکہ عالمی سطح پر بھی امن اور خوشحالی کو فروغ دیا جا سکے۔"

اسحاق ڈار نے واضح کیا کہ پاکستان مستقبل میں بھی ایران اور امریکہ کے درمیان مکالمے اور سفارتی کوششوں میں اپنا مثبت کردار ادا کرتا رہے گا۔