ایران کا دعویٰ: برطانیہ، بلغاریہ اور یوکرین نے جنگ میں شریک نہ ہونے کی یقین دہانی کرائی

تہران: ایرانی وزارت خارجہ کے ترجمان اسماعیل بقائی نے دعویٰ کیا ہے کہ برطانیہ، بلغاریہ اور یوکرین نے ایران کو یقین دہانی کرائی ہے کہ وہ جاری تنازع میں جنگ کا حصہ نہیں بنیں گے۔

ایک انٹرویو کے دوران اسماعیل بقائی نے کہا کہ امریکا نے مفاہمتی یادداشت (ایم او یو) کے تحت بحری آمدورفت کی بحالی کی اجازت نہیں دی۔ ان کے مطابق امریکا نے معاہدے کی مدت مکمل ہونے سے قبل ہی حملہ کیا، جس کے باعث صورتحال مزید پیچیدہ ہو گئی۔

انہوں نے کہا کہ آبنائے ہرمز کی بندش کا معاملہ امریکی وعدوں کی مبینہ خلاف ورزی سے جڑا ہوا ہے اور ایران اس تناظر میں اپنے مؤقف پر قائم ہے۔

ایرانی وزارت خارجہ کے ترجمان نے مزید بتایا کہ ایران اس وقت عمان کے ساتھ ایک نئے بحری راستے کے قیام پر بات چیت کر رہا ہے، تاہم آبنائے ہرمز کو دوبارہ کھولنے کا معاملہ عمان کے ساتھ جاری مذاکرات سے الگ ہے۔

اسماعیل بقائی کے یہ بیانات ایسے وقت میں سامنے آئے ہیں جب خطے میں کشیدگی برقرار ہے اور عالمی برادری تنازع کے سفارتی حل پر زور دے رہی ہے۔

واضح رہے کہ ایرانی وزارت خارجہ کے ان دعوؤں پر برطانیہ، بلغاریہ، یوکرین یا امریکا کی جانب سے تاحال کوئی باضابطہ ردعمل سامنے نہیں آیا ہے۔