بیروت پر اسرائیلی حملہ، 3 شہری شہید، ایران کا دوٹوک مؤقف: کارروائی کا جواب ضرور دیا جائے گا

(بیروت )لبنان کے دارالحکومت بیروت کے جنوبی مضافاتی علاقے پر اسرائیلی فضائی حملے میں 3 لبنانی شہری شہید جبکہ کم از کم 15 افراد زخمی ہو گئے۔ لبنانی حکام کے مطابق حملے اتوار کے روز کیے گئے، جن کے بعد علاقے میں امدادی کارروائیاں جاری ہیں اور زخمیوں کو قریبی اسپتالوں میں منتقل کیا گیا۔

لبنان کی سول ڈیفنس ایجنسی کے مطابق حملے سے ضاحیہ کا علاقہ بری طرح متاثر ہوا، جہاں متعدد عمارتوں کو نقصان پہنچا۔ ابتدائی اطلاعات کے مطابق شہید اور زخمی ہونے والوں میں عام شہری شامل ہیں۔

دوسری جانب اسرائیلی وزیر اعظم آفس کی جانب سے جاری بیان میں دعویٰ کیا گیا ہے کہ اسرائیلی فوج نے بیروت کے ضاحیہ علاقے میں حزب اللہ کے مبینہ ٹھکانوں کو نشانہ بنایا۔ اسرائیلی حکام کا کہنا ہے کہ یہ کارروائی سیکیورٹی خدشات کے تناظر میں کی گئی۔

ادھر ایرانی فوجی کمانڈر سردار اسدی نے اسرائیلی حملے کی شدید مذمت کرتے ہوئے کہا ہے کہ بیروت پر ہونے والی یہ کارروائی ہرگز بلاجواب نہیں رہے گی۔ اپنے بیان میں انہوں نے کہا کہ اسرائیل کے اقدامات کا مناسب وقت پر مؤثر اور فیصلہ کن جواب دیا جائے گا۔

سردار اسدی کا کہنا تھا کہ خطے میں کشیدگی بڑھانے کی ذمہ داری اسرائیل پر عائد ہوتی ہے، جبکہ ایران اور اس کے اتحادی موجودہ صورتحال کا مسلسل جائزہ لے رہے ہیں۔ انہوں نے اس عزم کا اظہار کیا کہ لبنان کے خلاف جارحیت پر خاموشی اختیار نہیں کی جائے گی۔

تجزیہ کاروں کے مطابق یہ حملہ ایسے حساس وقت میں ہوا ہے جب ایران اور امریکا کے درمیان ممکنہ امن معاہدے پر پیش رفت جاری ہے اور دونوں ممالک کے درمیان دستخطی عمل کی خبریں بھی سامنے آ رہی ہیں۔ ذرائع کے مطابق ایران کی جانب سے مذاکرات میں لبنان پر اسرائیلی حملوں کے خاتمے کو بھی اہم نکات میں شامل کیا گیا ہے۔

علاقائی صورتحال پر نظر رکھنے والے ماہرین کا کہنا ہے کہ اگر موجودہ کشیدگی میں کمی نہ آئی تو اس کے اثرات نہ صرف لبنان اور اسرائیل بلکہ پورے مشرق وسطیٰ کی سیکیورٹی صورتحال پر مرتب ہو سکتے ہیں۔