جے ڈی وینس کا پاکستان کے کردار کا اعتراف، مشرق وسطیٰ میں امن اولین ترجیح قرار

(برگن سٹاک)امریکی نائب صدر جے ڈی وینس نے مشرق وسطیٰ میں امن کے قیام کو امریکا کی اولین ترجیح قرار دیتے ہوئے کہا ہے کہ خطے میں کشیدگی کے خاتمے اور استحکام کے فروغ کے لیے پاکستان نے مثبت اور تعمیری کردار ادا کیا ہے، جسے عالمی سطح پر سراہا گیا ہے۔

امن مذاکرات کے موقع پر اپنے خطاب میں جے ڈی وینس نے کہا کہ امریکا خطے میں دیرپا امن کے قیام کے لیے تمام فریقین کے ساتھ تعاون کا خواہاں ہے اور ایران سے بھی مثبت اور تعمیری کردار کی توقع رکھتا ہے۔ انہوں نے کہا کہ موجودہ سفارتی عمل مستقبل میں بہتر فیصلوں اور خطے کے استحکام کی بنیاد بن سکتا ہے۔

امریکی نائب صدر نے وزیراعظم شہباز شریف اور فیلڈ مارشل سید عاصم منیر کی کاوشوں کو خراج تحسین پیش کرتے ہوئے کہا کہ فیلڈ مارشل سید عاصم منیر ایک بہترین سپہ سالار ہیں جنہوں نے امن کے فروغ اور مذاکراتی عمل کو آگے بڑھانے میں اہم کردار ادا کیا۔

اس موقع پر وزیراعظم شہباز شریف نے کہا کہ موجودہ صورتحال عالمی امن کے لیے ایک تاریخی موقع فراہم کر رہی ہے اور دنیا بھر کے رہنما امن، استحکام اور باہمی تعاون کے فروغ کے لیے ایک پلیٹ فارم پر جمع ہوئے ہیں۔

وزیراعظم نے کہا کہ امریکی صدر ڈونلڈ ٹرمپ کی قیادت میں مذاکراتی عمل کو آگے بڑھانے میں پیش رفت ہوئی، جبکہ فیلڈ مارشل سید عاصم منیر نے بھی سفارتی کوششوں اور رابطوں کے ذریعے مذاکرات کو کامیاب بنانے میں اہم کردار ادا کیا۔

شہباز شریف نے اس امید کا اظہار کیا کہ مشترکہ سفارتی کوششوں کے نتیجے میں نہ صرف مشرق وسطیٰ بلکہ پوری دنیا میں امن، اتحاد اور استحکام کو فروغ ملے گا۔

دریں اثنا قطر کے وزیراعظم نے بھی وزیراعظم شہباز شریف اور فیلڈ مارشل سید عاصم منیر کی کوششوں کو سراہتے ہوئے کہا کہ جاری امن عمل صرف ایک آغاز ہے اور خطے کے روشن مستقبل کے لیے مزید پیش رفت کی ضرورت ہے۔

انہوں نے کہا کہ آج ہونے والی سفارتی پیش رفت مشرق وسطیٰ سمیت عالمی امن و سلامتی کے لیے غیر معمولی اہمیت رکھتی ہے اور تمام فریق خطے میں پائیدار امن کے قیام کے لیے مشترکہ طور پر کام کر رہے ہیں۔