جوائنٹ عوامی ایکشن کمیٹی کے 4 مطلوب افراد کی گرفتاری پر ایک کروڑ روپے انعام کا اعلان

حکومت آزاد جموں و کشمیر نے جوائنٹ عوامی ایکشن کمیٹی سے تعلق رکھنے والے چار مطلوب افراد کی گرفتاری میں مدد فراہم کرنے والے شخص کے لیے ایک کروڑ روپے انعام مقرر کرنے کا اعلان کر دیا ہے۔

سرکاری نوٹیفکیشن کے مطابق انعامی فہرست میں شوکت نواز میر، عمر نذیر کشمیری، خواجہ مہران ارشد اور سردار امان خان کے نام شامل ہیں۔ حکومت کا کہنا ہے کہ ان افراد کی گرفتاری میں مؤثر معلومات فراہم کرنے والے شخص کو دس ملین روپے، یعنی ایک کروڑ روپے انعام دیا جائے گا۔

محکمہ داخلہ کی جانب سے جاری کیے گئے نوٹیفکیشن میں واضح کیا گیا ہے کہ معلومات فراہم کرنے والے فرد کی شناخت مکمل طور پر خفیہ رکھی جائے گی تاکہ اس کی سلامتی اور رازداری کو یقینی بنایا جا سکے۔

حکومت نے انعامی اسکیم پر فوری عملدرآمد کے لیے انسپکٹر جنرل پولیس آزاد کشمیر کو ضروری ہدایات بھی جاری کر دی ہیں۔ متعلقہ حکام کو مطلوب افراد کی گرفتاری کے لیے تمام قانونی اور انتظامی اقدامات تیز کرنے کی ہدایت کی گئی ہے۔

حکام کا کہنا ہے کہ انعامی اسکیم کا مقصد مطلوب افراد کی گرفتاری میں عوامی تعاون حاصل کرنا اور قانون نافذ کرنے والے اداروں کی کارروائیوں کو مؤثر بنانا ہے۔