کویتی وزیر خارجہ کی جی ایچ کیو آمد، فیلڈ مارشل عاصم منیر سے ملاقات، دفاعی تعاون بڑھانے پر اتفاق

راولپنڈی: کویت کے وزیر خارجہ شیخ جراح جابر الاحمد الصباح نے جنرل ہیڈکوارٹرز (جی ایچ کیو) کا دورہ کیا، جہاں انہوں نے فیلڈ مارشل اور چیف آف ڈیفنس فورسز سید عاصم منیر سے ملاقات کی۔ ملاقات میں باہمی دلچسپی کے امور، علاقائی سلامتی کی صورتحال اور دفاعی تعاون کے فروغ پر تفصیلی تبادلہ خیال کیا گیا۔

پاک فوج کے شعبہ تعلقات عامہ (آئی ایس پی آر) کے مطابق دونوں رہنماؤں نے پاکستان اور کویت کے دیرینہ برادرانہ تعلقات کو مزید مستحکم بنانے اور مختلف شعبوں میں تعاون کو وسعت دینے کے عزم کا اظہار کیا۔

آئی ایس پی آر کے مطابق ملاقات میں دفاعی اور سکیورٹی تعاون کے مختلف پہلوؤں پر بھی گفتگو ہوئی، جبکہ خطے میں امن، استحکام اور مشترکہ سلامتی کے لیے دونوں ممالک کے درمیان قریبی تعاون کی اہمیت پر زور دیا گیا۔

ترجمان پاک فوج نے بتایا کہ کویتی وزیر خارجہ نے خطے میں امن، استحکام اور سکیورٹی کے فروغ کے لیے پاکستان کے مثبت اور تعمیری کردار کو سراہا۔ انہوں نے پاکستان اور کویت کے درمیان مضبوط شراکت داری کو مزید وسعت دینے کی خواہش کا بھی اظہار کیا۔

اس موقع پر فیلڈ مارشل سید عاصم منیر نے کہا کہ پاکستان اور کویت کے درمیان مضبوط اور دیرینہ تعلقات دونوں ممالک کے لیے اہمیت رکھتے ہیں اور پاکستان ان تعلقات کو مزید فروغ دینے کے لیے پرعزم ہے۔

انہوں نے کہا کہ پاکستان اور کویت علاقائی امن، استحکام اور خوشحالی کے لیے مشترکہ وژن رکھتے ہیں، جبکہ دونوں ممالک باہمی دفاعی، سکیورٹی اور دیگر شعبوں میں تعاون کو مزید مضبوط بنانے کے لیے مل کر کام جاری رکھیں گے۔