پاکستان ریلوے میں 22 ہزار سے زائد آسامیاں خالی ہونے کا انکشاف، آپریشنز متاثر ہونے لگے

اسلام آباد: پاکستان ریلوے میں گریڈ 1 سے 21 تک مجموعی طور پر 22 ہزار 546 آسامیاں خالی ہونے کا انکشاف ہوا ہے، جس کے باعث ریلوے کے آپریشنز چلانے میں مشکلات کا سامنا ہے۔

ذرائع وزارتِ ریلوے کے مطابق ادارے میں ٹیکنیکل اور نان ٹیکنیکل عملے کی بڑی تعداد میں آسامیاں خالی ہیں۔ صوبہ پنجاب میں 12 ہزار 165، سندھ میں 7 ہزار 245، خیبرپختونخوا میں ایک ہزار 840 جبکہ بلوچستان میں ایک ہزار 296 آسامیاں خالی ہیں۔

ذرائع کا کہنا ہے کہ عملے کی کمی کے باعث ریلوے کے مختلف امور اور آپریشنز متاثر ہو رہے ہیں۔ ضرورت کے مطابق ریلوے میں ڈیلی ویجز پر لوئر ٹیکنیکل اسٹاف بھی بھرتی کیا جاتا ہے۔

ذرائع کے مطابق پاکستان ریلوے میں عملے کی کمی دور کرنے کے لیے ضروری بھرتیوں سے متعلق منصوبے پر کام جاری ہے۔