میر رضا کیس پر ماہرہ خان کا سخت ردعمل، ’’ہم سب ناانصافی کے خلاف سڑکوں پر نکلیں گے‘‘

کراچی: عالمی شہرت یافتہ پاکستانی اداکارہ ماہرہ خان نے کراچی کے نوجوان تاجر میر رضا کے قتل کیس پر ردعمل دیتے ہوئے مقتول کے وکیل جبران ناصر کی حمایت کردی ہے۔

گزشتہ کئی روز سے جبران ناصر کے بیانات کے مختلف کلپس سوشل میڈیا پر گردش کر رہے ہیں، جن پر ماہرہ خان نے بھی اپنا ردعمل ظاہر کیا۔

ماہرہ خان نے جبران ناصر کے ایک بیان پر تبصرہ کرتے ہوئے ان کی کاوشوں کو سراہا اور لکھا، ’’جبران ناصر، آپ بہترین کام کررہے ہیں، ہم سب اس ناانصافی کے خلاف سڑکوں پر نکلیں گے۔‘‘

اداکارہ نے مزید کہا کہ ’’یہ سب بکواس اب ختم ہونی چاہیے۔‘‘

دوسری جانب میر رضا کے وکیل جبران ناصر کے مطابق مقتول کے اہلخانہ نے عدالتی کمیشن پر رضامندی ظاہر نہیں کی۔

قبرکشائی کے بعد ابتدائی میڈیکل رپورٹ سامنے آگئی

میر رضا کی قبرکشائی کے بعد سامنے آنے والی ابتدائی میڈیکل رپورٹ کے مطابق مقتول کو پیچھے سے گولی لگی تھی جبکہ جسم پر تشدد کے نشانات بھی پائے گئے۔

رپورٹ میں دائیں ران اور جبڑے پر فریکچر کے شواہد کا بھی ذکر کیا گیا ہے۔ اس کے علاوہ جسم کے نچلے حصے کے ٹشوز پر خون کے دھبے پائے جانے کی بات بھی رپورٹ میں شامل ہے۔

میر رضا کیس کے حوالے سے وکیل جبران ناصر کی جانب سے اٹھائے گئے سوالات اور میڈیکل رپورٹ کے نکات کے بعد معاملہ ایک بار پھر توجہ کا مرکز بن گیا ہے، جبکہ ماہرہ خان کے ردعمل نے بھی اس کیس کو سوشل میڈیا پر نمایاں کردیا ہے۔