بحیرہ عرب میں پاکستان نیوی کی بڑی کارروائیاں، 96 ملین ڈالر کی منشیات برآمد

پاکستان نیوی نے بحیرہ عرب میں دو کامیاب انسدادِ منشیات کارروائیوں کے دوران 850 کلوگرام آئس اور 2 ہزار کلوگرام چرس/بھنگ برآمد کرلی۔ آئی ایس پی آر کے مطابق ضبط شدہ منشیات کی مالیت تقریباً 96 ملین ڈالر ہے
پاک فوج کے شعبہ تعلقات عامہ (آئی ایس پی آر) کے مطابق پاکستان نیوی نے بحیرہ عرب میں دو کامیاب انسدادِ منشیات کارروائیوں کے دوران تقریباً 96 ملین امریکی ڈالر مالیت کی منشیات برآمد کرلی۔
آئی ایس پی آر کے مطابق پاکستان نیوی کے جہاز یَرموک (YARMOOK) نے بحیرہ عرب میں تعیناتی کے دوران پاکستانی ساحل سے کافی دور دو کامیاب کارروائیاں کیں، جن کے دوران دو دھاؤں کو روکا گیا۔
ترجمان کے مطابق کارروائیوں کے دوران دھاؤں میں بنائے گئے خفیہ خانوں سے تقریباً 850 کلوگرام آئس اور 2 ہزار کلوگرام چرس/بھنگ برآمد کی گئی۔

آئی ایس پی آر کا کہنا ہے کہ ضبط شدہ منشیات کی مجموعی مالیت تقریباً 96 ملین امریکی ڈالر ہے۔ برآمد شدہ منشیات کو تحویل میں لے لیا گیا ہے اور مزید تلفی اور قانونی کارروائی کے لیے متعلقہ حکام کے حوالے کیا جائے گا۔
پاک فوج کے شعبہ تعلقات عامہ کے مطابق یہ کامیاب کارروائیاں پاکستان نیوی کی مسلسل سمندری موجودگی، چوکسی اور علاقائی بحری سلامتی کے تحفظ کے عزم کی عکاس ہیں۔ پاکستان نیوی سمندر کے ذریعے غیر قانونی منشیات کی اسمگلنگ کی روک تھام کے لیے اپنی کارروائیاں جاری رکھے ہوئے ہے۔
شائع ہوا: 7 اکتوبر، 2026 کو 12:01 PM
آخری تدوین: 7 اکتوبر، 2026



