پی ٹی آئی لانگ مارچ پر مولانا فضل الرحمان متحرک، حکومتی پیشکش پی ٹی آئی تک پہنچا دی

اسلام آباد: پی ٹی آئی کے جاری لانگ مارچ کے معاملے پر سیاسی رابطوں میں تیزی آگئی، مولانا فضل الرحمان نے پی ٹی آئی سے رابطہ کرکے حکومتی پیشکش پہنچا دی۔

ذرائع کے مطابق حکومتی وفد کی مولانا فضل الرحمان سے ملاقات کے بعد مولانا نے پاکستان تحریک انصاف کی قیادت سے رابطہ کیا اور حکومت کی جانب سے دی گئی پیشکش سے آگاہ کیا۔

ذرائع کا کہنا ہے کہ مولانا فضل الرحمان کے ٹیلی فونک رابطے کے بعد پی ٹی آئی نے ہنگامی اجلاس طلب کرلیا، جس میں پارٹی کی تمام اہم قیادت شریک ہے اور اجلاس زوم پر جاری ہے۔

ذرائع کے مطابق اس سے قبل مولانا فضل الرحمان نے حکومت کو مشورہ دیا تھا کہ گورنر راج یا ایمرجنسی کے بجائے معاملات کو افہام و تفہیم اور مذاکرات کے ذریعے حل کیا جائے۔

ذرائع کے مطابق مولانا کے مشورے کے بعد حکومت نے انہیں سیاسی طور پر کردار ادا کرنے کی درخواست کی تھی۔

واضح رہے کہ گزشتہ روز حکومتی وفد نے مولانا فضل الرحمان سے ملاقات کی تھی۔ وفد میں وزیراعظم کے سیاسی امور کے مشیر رانا ثنا اللہ، اسپیکر قومی اسمبلی ایاز صادق اور طارق فضل چوہدری شامل تھے۔

حکومتی پیشکش پر پی ٹی آئی کی قیادت کے جاری ہنگامی اجلاس میں مشاورت کی جارہی ہے، جس کے بعد آئندہ کے لائحہ عمل سے متعلق اہم فیصلہ متوقع ہے۔