مولانا فضل الرحمان کی محمود اچکزئی سے ملاقات، متحدہ اپوزیشن بنانے پر اتفاق

اسلام آباد: جمعیت علمائے اسلام (ف) کے سربراہ مولانا فضل الرحمان نے قومی اسمبلی میں اپوزیشن لیڈر محمود خان اچکزئی سے ملاقات کی، جس میں متحدہ اپوزیشن کا اتحاد بنانے اور اپوزیشن جماعتوں کے درمیان رابطے مزید بڑھانے پر اتفاق کیا گیا۔

ملاقات میں سینیٹ میں اپوزیشن لیڈر راجا ناصر عباس بھی شریک تھے۔ رہنماؤں نے ملک کی موجودہ سیاسی صورتحال، پارلیمانی امور، اپوزیشن جماعتوں کے باہمی تعاون اور آئندہ کی سیاسی حکمت عملی پر تفصیلی تبادلہ خیال کیا۔

ملاقات کے دوران بانی پی ٹی آئی عمران خان کی صحت کے حوالے سے بھی شدید تشویش کا اظہار کیا گیا۔ اپوزیشن قائدین نے مطالبہ کیا کہ سپریم کورٹ کے فیصلے کی روشنی میں عمران خان کو فوری طور پر اسپتال منتقل کرکے علاج کی بہترین طبی سہولیات فراہم کی جائیں۔

اپوزیشن رہنماؤں کا کہنا تھا کہ صحت کے معاملے پر سیاست نہیں ہونی چاہیے اور بانی پی ٹی آئی کو طبی ضرورت کے مطابق علاج کی سہولیات فراہم کرنا ضروری ہے۔

اجلاس میں قومی اسمبلی اور سینیٹ میں اپوزیشن جماعتوں کے ساتھ حکومتی رویے اور طرز عمل پر بھی تشویش کا اظہار کیا گیا۔ اپوزیشن رہنماؤں نے کہا کہ جمہوری نظام میں اپوزیشن کی آواز کو سنا جاتا ہے، دبایا نہیں جاتا۔

ملاقات کے بعد میڈیا سے گفتگو کرتے ہوئے مولانا فضل الرحمان نے کہا کہ متحدہ اپوزیشن بنانے کا فیصلہ کیا گیا ہے۔ انہوں نے کہا کہ یہ پہلی نشست تھی اور اس معاملے پر مزید مشاورت بھی کی جائے گی۔

مولانا فضل الرحمان کا کہنا تھا کہ اپوزیشن جماعتوں کے درمیان رابطوں کو مزید آگے بڑھایا جائے گا، جبکہ آل پارٹیز کانفرنس (اے پی سی) کے انعقاد پر بھی بات ہونی چاہیے۔

انہوں نے کہا کہ موجودہ سیاسی صورتحال کے تناظر میں اپوزیشن جماعتوں کے درمیان اتحاد اور باہمی مشاورت کا عمل جاری رکھا جائے گا۔