میسی نے انٹرنیشنل فٹبال کو خیرباد کہہ دیا، 21 سالہ شاندار کیریئر اختتام پذیر

بیونس آئرس: ارجنٹینا کے اسٹار فٹبالر لیونل میسی نے انٹرنیشنل فٹبال کو خیرباد کہہ دیا۔ انہوں نے افریقی ملک بینن کے خلاف دوستانہ میچ میں آخری بار ارجنٹینا کی نمائندگی کرتے ہوئے ایک گول اسکور کیا اور دو گولز میں معاونت کی، جس کی بدولت ارجنٹینا نے 0-3 سے کامیابی حاصل کی۔

بیونس آئرس میں کھیلے گئے میچ میں 39 سالہ لیونل میسی نے اپنا 208واں اور آخری انٹرنیشنل میچ کھیلا۔ 85 ہزار سے زائد تماشائیوں سے بھرے اسٹیڈیم میں شائقین اور ساتھی کھلاڑیوں نے میسی کو جذباتی انداز میں خراج تحسین پیش کیا۔

لیونل میسی ارجنٹینا کی جانب سے سب سے زیادہ میچز کھیلنے اور سب سے زیادہ گول کرنے والے کھلاڑی ہیں۔ انہوں نے قومی ٹیم کی جانب سے 208 میچز میں 126 گول کیے جبکہ 6 ورلڈ کپ ٹورنامنٹس میں شرکت کے دوران 21 گول اسکور کیے۔

میسی کی قیادت میں ارجنٹینا نے 2021 اور 2024 میں کوپا امریکا جبکہ 2022 میں فیفا ورلڈکپ کا ٹائٹل اپنے نام کیا۔

قومی ٹیم سے ریٹائرمنٹ کے باوجود لیونل میسی کلب فٹبال میں انٹر میامی کی نمائندگی جاری رکھیں گے۔ وہ 8 مرتبہ بیلن ڈی اور ایوارڈ جیتنے والے دنیا کے واحد فٹبالر بھی ہیں۔

میچ کے اختتام پر میسی نے جذباتی خطاب کرتے ہوئے کہا کہ ارجنٹینا کی قومی ٹیم کے لیے کھیلنا ان کی زندگی میں ہونے والی سب سے خوبصورت چیز ہے۔ انہوں نے کہا کہ وہ قومی ٹیم کی شرٹ اور شائقین کو بہت یاد کریں گے اور اب ٹیم کے ساتھ بطور حامی کھڑے رہیں گے۔