فیفا ورلڈ کپ 2026: میکسیکو جنوبی کوریا کو شکست دے کر ناک آؤٹ مرحلے میں پہنچنے والی پہلی ٹیم بن گیا

فیفا ورلڈ کپ 2026 میں میزبان ملک میکسیکو نے شاندار کارکردگی کا مظاہرہ کرتے ہوئے جنوبی کوریا کو ایک دلچسپ مقابلے کے بعد 0-1 سے شکست دے دی اور ناک آؤٹ مرحلے میں رسائی حاصل کرنے والی پہلی ٹیم بن گیا۔

گروپ اے کے اس اہم میچ میں دونوں ٹیموں نے آغاز سے ہی جارحانہ کھیل پیش کیا اور ایک دوسرے کے گول پر متعدد حملے کیے، تاہم پہلے ہاف میں کوئی بھی ٹیم گول کرنے میں کامیاب نہ ہو سکی۔ یوں میچ کا پہلا حصہ بغیر کسی گول کے برابری پر اختتام پذیر ہوا۔

دوسرے ہاف کے آغاز میں میکسیکو نے کھیل کا رخ اپنے حق میں موڑ لیا۔ میکسیکو کے مڈفیلڈر لوئیس رومو نے 50ویں منٹ میں شاندار گول اسکور کرکے اپنی ٹیم کو ایک صفر کی برتری دلائی، جو میچ کے اختتام تک برقرار رہی۔

جنوبی کوریا نے برابر کرنے کے لیے بھرپور کوشش کی، لیکن میکسیکو کے دفاع نے ان کی تمام کوششوں کو ناکام بنا دیا۔ میچ کے اختتام پر میزبان ٹیم ایک صفر کی برتری کے ساتھ کامیاب قرار پائی۔

اس کامیابی کے ساتھ میکسیکو نے نہ صرف گروپ مرحلے میں اپنی پوزیشن مستحکم کی بلکہ فیفا ورلڈ کپ 2026 کے ناک آؤٹ مرحلے کے لیے کوالیفائی کرنے والی پہلی ٹیم ہونے کا اعزاز بھی حاصل کر لیا۔

فیفا ورلڈ کپ 2026 میں آج گروپ اے اور گروپ بی کے مجموعی طور پر تین میچز کھیلے گئے، جن میں شائقین کو سنسنی خیز مقابلے دیکھنے کو ملے۔ میکسیکو کی اس کامیابی نے میزبان ملک کے مداحوں میں خوشی کی لہر دوڑا دی ہے اور ٹیم کے عالمی اعزاز کی دوڑ میں امکانات مزید روشن کر دیے ہیں۔