مجتبیٰ خامنہ ای نے محسن رضائی کو نئی ذمہ داری سونپ دی، سپریم نیشنل سکیورٹی کونسل کا نمائندہ مقرر

تہران: ایران کے سپریم لیڈر مجتبیٰ خامنہ ای نے اپنے سینئر مشیر محسن رضائی کو نئی اہم ذمہ داری سونپ دی ہے۔ایرانی میڈیا کے مطابق محسن رضائی کو ایران کی سپریم نیشنل سکیورٹی کونسل میں سپریم لیڈر کا نمائندہ مقرر کر دیا گیا ہے۔ محسن رضائی اس سے قبل بھی ایرانی سپریم لیڈر کے سینئر مشیر کی حیثیت سے ذمہ داریاں انجام دے رہے ہیں۔

محسن رضائی ایران کی سکیورٹی اور عسکری امور میں طویل تجربہ رکھنے والی اہم شخصیت سمجھے جاتے ہیں۔ وہ ماضی میں ایران کی پاسداران انقلاب کے سربراہ بھی رہ چکے ہیں اور 1981ء سے 1997ء تک اس منصب پر فائز رہے۔

ایرانی سکیورٹی معاملات میں وسیع تجربے کے باعث محسن رضائی کو ملک کی طاقتور اور بااثر شخصیات میں شمار کیا جاتا ہے۔ وہ ایرانی قیادت کے قریبی اور بااعتماد ساتھیوں میں بھی شامل رہے ہیں۔

سپریم نیشنل سکیورٹی کونسل میں سپریم لیڈر کے نمائندے کی نئی ذمہ داری ایسے وقت میں سامنے آئی ہے جب ایران کو خطے میں بڑھتی ہوئی سکیورٹی کشیدگی اور امریکا کے ساتھ جاری تنازع کا سامنا ہے۔