ایران کی امریکا کو بحری ناکہ بندی ختم کرنے کی وارننگ، محسن رضائی نے سخت نتائج سے خبردار کر دیا

تہران: ایرانی سپریم لیڈر کے مشیر محسن رضائی نے امریکا کو بحری ناکہ بندی کے معاملے پر سخت نتائج سے خبردار کرتے ہوئے کہا ہے کہ اگر یہ صورتحال برقرار رہی تو ایران بھرپور جواب دے گا۔

ایرانی میڈیا کے مطابق محسن رضائی نے کہا کہ ایران نے امریکا کو واضح پیغام دیا ہے کہ بحری ناکہ بندی جاری رکھنے کی صورت میں خطے میں امریکی بحریہ محفوظ نہیں رہے گی۔ ان کے بقول ایران اپنے قومی مفادات اور بحری راستوں کے تحفظ کے لیے ہر ضروری اقدام اٹھانے کا حق محفوظ رکھتا ہے۔

انہوں نے کہا کہ ایران پہلے ہی امریکا کو ممکنہ نتائج سے آگاہ کر چکا ہے اور واشنگٹن کو چاہیے کہ وہ بحری ناکہ بندی کی پالیسی پر نظرثانی کرے تاکہ خطے میں مزید کشیدگی سے بچا جا سکے۔

محسن رضائی نے امریکا پر زور دیا کہ وہ بحری ناکہ بندی ختم کرے، بصورت دیگر پیدا ہونے والی صورتحال کی ذمہ داری واشنگٹن پر عائد ہوگی۔

یہ بیان ایسے وقت میں سامنے آیا ہے جب مشرقِ وسطیٰ میں کشیدگی برقرار ہے اور خطے میں بحری سلامتی اور بین الاقوامی جہاز رانی سے متعلق خدشات میں اضافہ دیکھا جا رہا ہے۔