کراچی میں منکی پاکس کے کیسز میں اضافہ، گلستانِ جوہر کے 40 سالہ شخص میں وائرس کی تصدیق

کراچی میں منکی پاکس کا ایک اور کیس رپورٹ ہونے کے بعد شہر میں مجموعی کیسز کی تعداد 10 تک پہنچ گئی ہے۔ تازہ کیس گلستانِ جوہر کے 40 سالہ شخص میں سامنے آیا ہے، جس کی لیبارٹری ٹیسٹ کے ذریعے تصدیق کی گئی۔

ہسپتال انتظامیہ کے مطابق متاثرہ شخص کی کوئی بیرونِ ملک سفر کی ہسٹری نہیں ہے، جس کے باعث مقامی سطح پر وائرس کے پھیلاؤ کے خدشات پر توجہ مرکوز کی جا رہی ہے۔ مریض کو علاج اور نگرانی کے لیے نیپا اسپتال کے آئسولیشن وارڈ میں منتقل کر دیا گیا ہے۔

انتظامیہ کا کہنا ہے کہ مریض کا پی سی آر ٹیسٹ کیا گیا تھا، جس کی رپورٹ مثبت آنے پر ایم پاکس کی تصدیق ہوئی۔ نیپا اسپتال میں اب تک منکی پاکس کے 7 کیسز رپورٹ ہو چکے ہیں، جبکہ کراچی بھر میں متاثرہ افراد کی تعداد 10 ہو گئی ہے۔

صحت حکام کے مطابق وائرس کے مزید پھیلاؤ کو روکنے کے لیے متاثرہ مریضوں کو آئسولیشن میں رکھا جا رہا ہے اور ان کے قریبی رابطوں کی بھی نگرانی کی جا رہی ہے۔

ماہرین صحت نے شہریوں کو ہدایت کی ہے کہ بخار، جلد پر دانے، جسم درد یا دیگر مشتبہ علامات کی صورت میں فوری طور پر طبی مشورہ حاصل کریں اور احتیاطی تدابیر پر عمل کریں تاکہ بیماری کے پھیلاؤ کو روکا جا سکے۔