محمد عباس کی تباہ کن بولنگ، ویسٹ انڈیز کو برتری کے باوجود پہلا ٹیسٹ سنسنی خیز مرحلے میں داخل

پاکستان اور ویسٹ انڈیز کے درمیان جاری پہلے ٹیسٹ میچ کا تیسرا روز بولرز کے نام رہا، جہاں دونوں ٹیموں کی مجموعی طور پر 14 وکٹیں گریں۔ دلچسپ مقابلے میں ویسٹ انڈیز نے دن کے اختتام تک 155 رنز کی مجموعی برتری حاصل کر لی، جبکہ میچ فیصلہ کن مرحلے میں داخل ہو گیا ہے۔

پاکستان نے تیسرے روز اپنی پہلی اننگز 199 رنز پر 3 کھلاڑی آؤٹ سے دوبارہ شروع کی۔ کپتان شان مسعود نے ذمہ دارانہ بیٹنگ کرتے ہوئے اپنے ٹیسٹ کیریئر کی ساتویں سنچری اسکور کی اور 109 رنز بنا کر آؤٹ ہوئے۔ امام الحق نے 63 رنز کی عمدہ اننگز کھیلی، جبکہ سلمان علی آغا نے بھی اہم رنز جوڑے، تاہم ان کے آؤٹ ہونے کے بعد پاکستانی بیٹنگ لائن زیادہ دیر مزاحمت نہ کر سکی اور پوری ٹیم 282 رنز پر ڈھیر ہوگئی۔

ویسٹ انڈیز کی جانب سے جسٹن گریوز نے شاندار بولنگ کا مظاہرہ کرتے ہوئے 27 رنز کے عوض 5 وکٹیں حاصل کیں، جو ان کے ٹیسٹ کیریئر کی بہترین بولنگ کارکردگی ہے۔ میزبان ٹیم نے پہلی اننگز میں 29 رنز کی برتری حاصل کی۔

دوسری اننگز میں ویسٹ انڈیز کا آغاز بھی مشکلات سے دوچار رہا۔ تجربہ کار فاسٹ بولر محمد عباس نے نئی گیند سے تباہ کن اسپیل کرتے ہوئے ابتدائی اوورز میں برینڈن کنگ اور کیوم ہوج کو آؤٹ کیا اور میزبان ٹیم پر دباؤ بڑھا دیا۔

محمد علی نے عامر جنگو کی وکٹ حاصل کی، جبکہ خرم شہزاد اور عامر جمال نے بھی نپی تلی بولنگ کے ذریعے ویسٹ انڈین بیٹرز کو کھل کر کھیلنے کا موقع نہیں دیا۔ پہلی اننگز کے نمایاں بلے باز شائی ہوپ اس بار صرف 10 رنز بنا کر خرم شہزاد کی گیند پر بولڈ ہوگئے۔

ویسٹ انڈیز کی جانب سے ٹیگنرائن چندرپال نے 35 رنز کی مزاحمتی اننگز کھیلی، جبکہ جسٹن گریوز نے بھی اہم رنز کا اضافہ کیا۔ تاہم پاکستانی بولرز وقفے وقفے سے وکٹیں حاصل کرتے رہے اور میچ میں اپنی ٹیم کی واپسی کی امید برقرار رکھی۔

دن کے اختتامی لمحات میں شمر جوزف نے جارحانہ انداز اپناتے ہوئے عامر جمال کو تین چھکے لگائے اور ناقابلِ شکست 22 رنز بنا کر ویسٹ انڈیز کی مجموعی برتری 155 رنز تک پہنچانے میں اہم کردار ادا کیا۔ ان کے ساتھ کیمار روچ کریز پر موجود ہیں۔

تیسرے روز کے اختتام پر ویسٹ انڈیز نے اپنی دوسری اننگز میں 7 وکٹوں کے نقصان پر 126 رنز بنائے ہیں اور اسے پاکستان پر 155 رنز کی مجموعی برتری حاصل ہے۔

پاکستان کی جانب سے محمد عباس نے ایک بار پھر اپنی کلاس ثابت کرتے ہوئے 3 اہم وکٹیں حاصل کیں۔ اب چوتھے روز قومی ٹیم کی کوشش ہوگی کہ ویسٹ انڈیز کی باقی ماندہ وکٹیں جلد حاصل کر کے ہدف کو قابلِ حصول حد میں رکھا جائے، تاکہ پہلے ٹیسٹ میں کامیابی کی امید برقرار رہے۔