ضروری نہیں سوتیلی مائیں بری ہوں، میری سوتیلی والدہ بہت اچھی ہیں: نازش جہانگیر

پاکستانی اداکارہ نازش جہانگیر نے اپنی سوتیلی والدہ کے ساتھ تعلق اور معاشرے میں سوتیلی ماؤں سے متعلق عام تصورات پر کھل کر گفتگو کی ہے۔

ایک حالیہ انٹرویو میں نازش جہانگیر نے بتایا کہ ان کی والدہ کے انتقال کے بعد ان کے والد نے دوسری شادی کی۔ اداکارہ کے مطابق شروع میں انہیں اس رشتے کو قبول کرنے میں کچھ وقت لگا، تاہم ان کی سوتیلی والدہ نے اپنے اچھے رویے سے دل میں جگہ بنائی۔

نازش جہانگیر کا کہنا تھا کہ ضروری نہیں تمام سوتیلی مائیں بری ہوں، معاشرے میں سوتیلی ماں کے حوالے سے بہت سی کہانیاں اور تصورات موجود ہیں۔

اداکارہ نے بتایا کہ ان کی سوتیلی والدہ پورے خاندان کا بہت اچھے طریقے سے خیال رکھتی ہیں اور ان کے والد کی بھی دیکھ بھال کرتی ہیں، اس لیے وہ یہ نہیں کہہ سکتیں کہ سوتیلی مائیں بری ہوتی ہیں۔

نازش جہانگیر کے مطابق ایک ڈرامے میں سوتیلی ماں کا کردار ادا کرتے ہوئے انہیں اپنی حقیقی زندگی سے بھی مماثلت محسوس ہوئی۔ وہ اپنی سوتیلی والدہ کو فون کرکے کہتی تھیں کہ اب انہیں احساس ہوتا ہے کہ وہ کن حالات سے گزری ہوں گی۔