مذاکرات ہونے چاہئیں، لیکن تحریک انصاف کا لانگ مارچ بھی ہوگا: بیرسٹر گوہر

اسلام آباد :پاکستان تحریک انصاف کے چیئرمین بیرسٹر گوہر نے وزیراعظم کی جانب سے مذاکرات کو مشروط کرنے پر مایوسی کا اظہار کرتے ہوئے کہا ہے کہ سیاست میں لکیریں نہیں کھینچی جاتیں، بات چیت ہمیشہ کھلے ماحول اور بغیر کسی شرط کے ہونی چاہیے۔

پارلیمنٹ ہاؤس میں میڈیا سے گفتگو کرتے ہوئے بیرسٹر گوہر نے کہا کہ تحریک انصاف کا لانگ مارچ جاری ہے اور مذاکرات لانگ مارچ ختم کرنے کے لیے ہو رہے تھے۔ ان کا کہنا تھا کہ لانگ مارچ اسلام آباد پہنچ بھی گیا تو مطالبات منوانے کے لیے مذاکرات کرنا پڑیں گے۔

انہوں نے کہا کہ گزشتہ رات ان کی محسن نقوی سے کوئی ملاقات نہیں ہوئی۔ بیرسٹر گوہر کا کہنا تھا کہ ملاقاتوں میں ہونے والی باتیں وہ نہیں چھپاتے بلکہ سب کچھ بتا دیتے ہیں۔ ان کے مطابق بانی پی ٹی آئی عمران خان کی بہنوں اور کزن کی گرفتاری سے تلخی پیدا ہوئی ہے۔

پی ٹی آئی چیئرمین نے کہا کہ مذاکرات کی میز پر بیٹھنے کے لیے تحریک انصاف نے بہت کچھ کیا، مذاکرات کے لیے بیٹھنا آسان نہیں تھا اور چیزیں راتوں رات تبدیل نہیں ہوتیں۔

بیرسٹر گوہر نے واضح کیا کہ لانگ مارچ اسلام آباد ضرور آئے گا۔ ان کے مطابق قافلہ پشاور سے خیبر اور پیرودہائی کے راستے اسلام آباد کی جانب بڑھے گا۔

انہوں نے بتایا کہ وہ کل پشاور میں وزیراعلیٰ خیبرپختونخوا سہیل آفریدی سے ملاقات کریں گے۔ بیرسٹر گوہر نے کہا کہ لانگ مارچ اسلام آباد پہنچ بھی گیا تو بات چیت کرنا ہوگی اور مطالبات پر پیش رفت بھی ضروری ہے۔