اگر بیرون ملک گرفتار کرنے کی کوشش ہوئی تو خصوصی دستے تیار ہیں، نیتن یاہو کا دعویٰ

واشنگٹن: اسرائیلی وزیراعظم بنیامین نیتن یاہو نے دعویٰ کیا ہے کہ اگر انہیں بیرون ملک گرفتار کرنے کی کوشش کی گئی تو ان کی حفاظت اور صورتحال سے نمٹنے کے لیے خصوصی دستے تیار ہوں گے۔

وائٹ ہاؤس میں امریکی صدر سے ملاقات کے بعد ایک امریکی ٹی وی چینل کو انٹرویو دیتے ہوئے نیتن یاہو نے کہا کہ وہ آئندہ ستمبر میں اقوام متحدہ کی جنرل اسمبلی کے اجلاس میں شرکت کے لیے نیویارک ضرور جائیں گے اور اپنا دورہ منسوخ کرنے کا کوئی ارادہ نہیں رکھتے۔

انہوں نے کہا، "اگر مجھے گرفتار کرنے کی کوشش کی گئی تو میرے گرد خصوصی دستے موجود ہوں گے۔" تاہم نیتن یاہو نے یہ واضح نہیں کیا کہ ان خصوصی دستوں کا کردار یا ذمہ داریاں کیا ہوں گی۔

یہ بیان ایسے وقت سامنے آیا ہے جب نیویارک کے میئر ظہران ممدانی کی جانب سے نیتن یاہو کی گرفتاری کا مطالبہ کیا جا رہا ہے، جبکہ ذرائع ابلاغ میں بین الاقوامی فوجداری عدالت (آئی سی سی) کی جانب سے ان کے خلاف جاری گرفتاری وارنٹ کا بھی ذکر کیا جا رہا ہے۔

اسی تناظر میں دی اکانومسٹ اور یوگوو کے ایک حالیہ سروے کے مطابق 49 فیصد امریکی بالغ افراد کا خیال تھا کہ اگر نیتن یاہو نیویارک آئیں تو انہیں آئی سی سی کے وارنٹ کے تحت گرفتار کیا جانا چاہیے، جبکہ 27 فیصد نے اس کی مخالفت کی اور 23 فیصد نے کوئی واضح رائے نہیں دی۔

نیتن یاہو نے نیویارک کے میئر ظہران ممدانی پر یہودیوں کے خلاف نفرت کو ہوا دینے کا الزام عائد کرتے ہوئے کہا کہ وہ شہر کی یہودی برادری کے خلاف عوامی جذبات بھڑکانے کی کوشش کر رہے ہیں۔

اسرائیلی وزیراعظم نے بین الاقوامی فوجداری عدالت کے گرفتاری وارنٹ کو مسترد کرتے ہوئے آئی سی سی کو "بدعنوان" اور "برائی پر مبنی ادارہ" قرار دیا۔ ان کا کہنا تھا کہ عدالت کی ایسی کارروائیاں مستقبل میں امریکی حکام اور فوجیوں کے خلاف بھی استعمال کی جا سکتی ہیں۔

علاقائی صورتحال پر گفتگو کرتے ہوئے نیتن یاہو نے ایران کو خبردار کیا کہ اگر اس نے اسرائیل پر حملہ کیا تو اسے سخت اور بھرپور جواب کا سامنا کرنا پڑے گا۔

انہوں نے مزید کہا کہ اسرائیل، معاہدہ ابراہیمی کے دائرہ کار کو سعودی عرب تک وسعت دینے کا خیرمقدم کرے گا اور اس حوالے سے پیش رفت کا خواہاں ہے۔