اڈیالہ جیل میں نورین نیازی کی عمران خان سے 45 منٹ ملاقات، سپریم کورٹ کے حکم سے آگاہ کردیا

راولپنڈی: اڈیالہ جیل میں بانی پاکستان تحریک انصاف (پی ٹی آئی) عمران خان سے ان کی ہمشیرہ نورین نیازی کی ملاقات کرادی گئی۔

ذرائع کے مطابق عمران خان اور نورین نیازی کی ملاقات جیل کے کانفرنس روم میں ہوئی، جو تقریباً 45 منٹ تک جاری رہی۔ ملاقات کے دوران عمران خان کی صحت سمیت دیگر اہم امور پر گفتگو کی گئی۔

جیل ذرائع کا کہنا ہے کہ نورین نیازی نے عمران خان کو سپریم کورٹ کے حالیہ حکم سے بھی آگاہ کیا، جس میں بانی پی ٹی آئی کو شفا انٹرنیشنل اسپتال منتقل کرنے اور ان کے لیے میڈیکل بورڈ تشکیل دینے کی ہدایت کی گئی ہے۔

ملاقات کے بعد نورین نیازی اڈیالہ جیل کے ڈاہگل ناکے پہنچیں، جہاں صحافیوں نے ان سے گفتگو کی کوشش کی، تاہم انہوں نے تفصیلی گفتگو سے گریز کیا۔ ایک صحافی کے سوال پر نورین نیازی نے صرف ملاقات کی تصدیق کرتے ہوئے کہا کہ "ملاقات ہوگئی ہے۔"

بعد ازاں علیمہ خان اور عظمیٰ خان بھی نورین نیازی کی گاڑی میں بیٹھ کر وہاں سے روانہ ہوگئیں۔

خیال رہے کہ سپریم کورٹ نے بانی پی ٹی آئی عمران خان کو شفا اسپتال منتقل کرنے کا حکم دیتے ہوئے ان کے لیے میڈیکل بورڈ تشکیل دینے کی ہدایت کی ہے۔ عدالت نے قرار دیا کہ عمران خان کو سخت سکیورٹی میں اسپتال منتقل کیا جائے اور اسپتال کے باہر امن و امان کی صورتحال متاثر نہیں ہونی چاہیے۔