شمالی کوریا کا دوٹوک اعلان: جوہری ہتھیاروں کے خاتمے کا امکان ہمیشہ کے لیے ختم ہو چکا

شمالی کوریا نے ایک بار پھر اپنے جوہری پروگرام کے حوالے سے سخت مؤقف اختیار کرتے ہوئے اعلان کیا ہے کہ جوہری ہتھیاروں کے خاتمے کا امکان اب ہمیشہ کے لیے ختم ہو چکا ہے۔

شمالی کوریا کی وزارتِ خارجہ کے ترجمان نے اپنے بیان میں کہا کہ امریکا اور اس کے اتحادی ممالک کی جانب سے ڈیموکریٹک پیپلز ریپبلک آف کوریا کے خلاف مسلسل دباؤ، بیانات اور جوہری خطرات پیدا کرنے کی کوششیں ملک کی جوہری حیثیت کو متاثر نہیں کر سکتیں۔

ترجمان کے مطابق شمالی کوریا ایک جوہری ہتھیاروں سے لیس ریاست ہے اور اس حقیقت کو تبدیل کرنے کی تمام کوششیں ناکام ثابت ہوں گی۔ انہوں نے واضح کیا کہ جوہری ہتھیاروں کے خاتمے کا معاملہ اب ماضی کا حصہ بن چکا ہے اور اس پر مزید بات چیت کی گنجائش نہیں رہی۔

یہ بیان ایسے وقت میں سامنے آیا ہے جب امریکا اور جنوبی کوریا کے اعلیٰ حکام نے سیؤل میں نیوکلیئر کنسلٹیٹو گروپ کے تحت مذاکرات کیے۔ ان مذاکرات میں شمالی کوریا کے بڑھتے ہوئے جوہری اور میزائل پروگرام کے تناظر میں جوہری ڈیٹرنس اور دیگر دفاعی اقدامات پر غور کیا گیا۔

دوسری جانب خطے میں سفارتی سرگرمیاں بھی جاری ہیں۔ حال ہی میں چین کے صدر شی جن پنگ نے شمالی کوریا کا دورہ کیا، جسے دونوں ممالک کے درمیان تعلقات کے فروغ کے ساتھ ساتھ علاقائی اور عالمی سطح پر اسٹریٹجک اہمیت کا حامل قرار دیا جا رہا ہے۔