شمالی وزیرستان میں سکیورٹی فورسز کا کامیاب آپریشن، 5 دہشت گرد ہلاک، میجر حافظ احسان الٰہی شہید

راولپنڈی: شمالی وزیرستان کے علاقے رزمک میں سکیورٹی فورسز نے خفیہ اطلاعات کی بنیاد پر کیے گئے انٹیلی جنس بیسڈ آپریشن (IBO) میں بھارتی حمایت یافتہ فتنہ الخوارج کے پانچ دہشت گرد ہلاک کر دیے، جبکہ شدید فائرنگ کے تبادلے میں پاک فوج کے میجر حافظ احسان الٰہی جامِ شہادت نوش کر گئے۔

پاک فوج کے شعبۂ تعلقات عامہ (آئی ایس پی آر) کے مطابق سکیورٹی فورسز نے دہشت گردوں کی موجودگی کی مصدقہ اطلاع پر آپریشن کیا۔ کارروائی کے دوران فورسز نے مؤثر حکمت عملی کے ساتھ دہشت گردوں کے ٹھکانوں کو نشانہ بنایا، جس کے نتیجے میں پانچ دہشت گرد مارے گئے۔

آئی ایس پی آر کے مطابق آپریشن کے دوران دہشت گردوں کی جانب سے شدید مزاحمت کی گئی، جس کے نتیجے میں فائرنگ کے تبادلے میں 34 سالہ میجر حافظ احسان الٰہی شہید ہو گئے۔ میجر حافظ احسان الٰہی کا تعلق ضلع میانوالی سے تھا اور وہ آپریشن کے دوران اپنے جوانوں کی قیادت کرتے ہوئے بہادری سے لڑے۔

ترجمان پاک فوج نے بتایا کہ علاقے میں کلیئرنس آپریشن جاری ہے اور آخری دہشت گرد کے خاتمے تک کارروائی جاری رکھی جائے گی تاکہ علاقے کو مکمل طور پر دہشت گردوں سے پاک کیا جا سکے۔

آئی ایس پی آر نے اس عزم کا اعادہ کیا کہ پاکستان کی سکیورٹی فورسز ملک سے دہشت گردی کے مکمل خاتمے کے لیے پرعزم ہیں اور شہداء کی قربانیاں اس جدوجہد کو مزید مضبوط بناتی ہیں۔