بھارتی پروازوں کے لیے پاکستان کی فضائی حدود کی بندش میں مزید توسیع

اسلام آباد: پاکستان نے بھارتی پروازوں کے لیے اپنی فضائی حدود کی بندش میں مزید توسیع کر دی ہے۔ پاکستان ایئرپورٹ اتھارٹی کی جانب سے جاری نئے نوٹم کے مطابق بھارتی طیاروں پر پاکستانی فضائی حدود میں داخلے کی پابندی 24 ستمبر تک برقرار رہے گی۔

نوٹم کے مطابق بھارت میں رجسٹرڈ تمام بھارتی ایئر لائنز، لیز پر حاصل کیے گئے طیاروں، بھارتی شہریوں کی ملکیت یا ان کے زیرِ انتظام کمرشل اور فوجی طیاروں کے پاکستانی فضائی حدود میں داخلے پر پابندی عائد ہے۔

پاکستان ایئرپورٹ اتھارٹی کے مطابق یہ پابندی 18 اگست سے نافذ ہے اور پاکستانی وقت کے مطابق 24 ستمبر کی صبح 4 بج کر 59 منٹ تک برقرار رہے گی۔

واضح رہے کہ بھارتی پروازوں کے لیے پاکستانی فضائی حدود کی بندش کا سلسلہ 23 اپریل 2025 سے جاری ہے۔ اس حوالے سے پاکستان ایئرپورٹ اتھارٹی کی جانب سے اب 16واں نوٹم جاری کیا گیا ہے۔

فضائی حدود کی بندش کے باعث دونوں ممالک کے درمیان فضائی رابطوں اور بھارتی ایئر لائنز کی پروازوں کے روٹس پر مسلسل اثرات مرتب ہو رہے ہیں۔