پاکستان اور بحرین کا تجارت، سرمایہ کاری اور اقتصادی تعاون بڑھانے پر اتفاق

اسلام آباد: نائب وزیراعظم اور وزیر خارجہ سینیٹر محمد اسحاق ڈار سے بحرین کے وزیر خارجہ ڈاکٹر عبداللطیف بن راشد الزیانی نے وزارت خارجہ میں اہم ملاقات کی، جس میں پاکستان اور بحرین کے درمیان تجارت، سرمایہ کاری اور اقتصادی تعاون کو مزید فروغ دینے پر اتفاق کیا گیا۔

ملاقات کے دوران دونوں رہنماؤں نے پاک بحرین تعلقات کے مختلف پہلوؤں کا جائزہ لیا اور دوطرفہ تجارتی سرگرمیوں، معاشی شراکت داری اور سرمایہ کاری کے شعبوں میں تعاون بڑھانے کے امکانات پر تبادلہ خیال کیا۔

اسحاق ڈار اور بحرینی وزیر خارجہ نے کثیرالجہتی بین الاقوامی فورمز پر مشترکہ دلچسپی کے معاملات میں رابطوں کو مزید مؤثر بنانے پر بھی گفتگو کی۔

دونوں وزرائے خارجہ نے اعلیٰ سطح کے سفارتی رابطوں میں ہونے والی مثبت پیش رفت پر اطمینان کا اظہار کرتے ہوئے دوطرفہ تعلقات میں موجودہ مثبت رجحان کو مزید آگے بڑھانے کے عزم کا اعادہ کیا۔

ملاقات میں باہمی مفادات سے متعلق مختلف شعبوں میں تعاون بڑھانے کے ساتھ ساتھ خطے کی بدلتی ہوئی صورتحال اور عالمی سطح پر ہونے والی اہم پیش رفت کا بھی جائزہ لیا گیا۔

اس موقع پر دونوں رہنماؤں نے اس بات پر اتفاق کیا کہ اختلافات اور تنازعات کے حل کے لیے مذاکرات اور سفارت کاری ہی سب سے زیادہ قابلِ عمل راستے ہیں۔