پاکستان اور افغانستان میں امن بات چیت مستحکم انداز میں آگے بڑھ رہی ہے: چین

(بیجنگ )چین کی وزارت خارجہ کی ترجمان ماؤ ننگ نے اپنے بیان میں کہا کہ پاکستان اور افغانستان دونوں چین کی ثالثی کو اہمیت دیتے ہیں اور مذاکرات کے عمل کو آگے بڑھانے پر متفق ہیں۔ انہوں نے کہا کہ چین دونوں ممالک کے درمیان سازگار ماحول پیدا کرنے اور بات چیت کو فروغ دینے کے لیے قریبی رابطے میں ہے۔

واضح رہے کہ پاکستان کے دفتر خارجہ نے بھی تصدیق کی تھی کہ چین کے شہر ارومچی میں پاکستان اور افغانستان کے درمیان مذاکرات ہوئے ہیں۔ ماؤ ننگ نے مذاکرات کے مقام کی تفصیلات فراہم نہیں کیں، تاہم دونوں ممالک پہلے ہی ارومچی میں بات چیت کی تصدیق کر چکے ہیں۔

چینی ترجمان کا کہنا تھا کہ تینوں ممالک مناسب وقت پر مذاکرات کی مزید تفصیلات جاری کریں گے۔ انہوں نے کہا کہ چین علاقائی امن اور استحکام کے لیے پاکستان اور افغانستان کے درمیان ثالثی کا کردار ادا کرتا رہے گا۔

دوسری جانب پاکستان کے دفتر خارجہ کے ترجمان طاہر اندرابی نے کہا کہ تعلقات میں بہتری کے لیے افغانستان سے واضح اور قابل تصدیق تحریری یقین دہانیاں ضروری ہیں۔ انہوں نے کہا کہ ماضی میں زبانی وعدے ناکافی ثابت ہوئے ہیں، جس کی مثال 2021 کا دوحہ معاہدہ ہے۔

ترجمان دفتر خارجہ نے مزید بتایا کہ ارومچی میں جاری مذاکرات ورکنگ لیول پر ہو رہے ہیں اور پاکستانی وفد ابھی چین میں موجود ہے۔ انہوں نے کہا کہ وفد کی واپسی کے بعد مذاکرات میں پیش رفت کی واضح تصویر سامنے آئے گی۔