پاکستان اور ایران کا دوطرفہ تجارت 10 ارب ڈالر تک بڑھانے کا عزم

اسلام آباد: پاکستان اور ایران نے سالانہ دوطرفہ تجارت کا حجم 10 ارب ڈالر تک بڑھانے کے عزم کا اعادہ کرتے ہوئے اقتصادی تعاون، سرمایہ کاری اور تجارتی روابط کو مزید مضبوط بنانے پر اتفاق کیا ہے۔

اسلام آباد میں پاکستان اور ایران کے وفود کے درمیان دسویں مشترکہ تجارتی کمیٹی (Joint Trade Committee) کا اجلاس منعقد ہوا، جس کی مشترکہ صدارت وفاقی وزیر تجارت جام کمال خان اور ایرانی وزیر صنعت و تجارت ڈاکٹر محمد اتابک نے کی۔

اجلاس کا مقصد دونوں ہمسایہ ممالک کے درمیان دوطرفہ تجارت، سرمایہ کاری، سرحدی تعاون اور اقتصادی روابط کو فروغ دینا تھا۔

اجلاس کے بعد جاری مشترکہ اعلامیے میں کہا گیا کہ پاکستان اور ایران نے دوطرفہ تجارت کا حجم موجودہ سطح سے بڑھا کر 10 ارب ڈالر سالانہ تک لے جانے کے عزم کا اعادہ کیا ہے۔

وفاقی وزیر تجارت جام کمال خان نے کہا کہ پاکستان اور ایران کے درمیان تاریخی، مذہبی اور برادرانہ تعلقات کو مضبوط معاشی شراکت داری میں تبدیل کرنا وقت کی اہم ضرورت ہے۔ انہوں نے کہا کہ حکومت کاروبار میں آسانیاں پیدا کرنے، برآمدات بڑھانے اور نئی عالمی منڈیوں تک رسائی کے لیے مؤثر اقدامات کر رہی ہے۔

انہوں نے پاک ایران فری ٹریڈ ایگریمنٹ (FTA) کو جلد حتمی شکل دینے پر زور دیتے ہوئے کہا کہ سرحدی لاجسٹکس، کسٹمز کلیئرنس اور کارگو نقل و حرکت میں حائل رکاوٹوں کا خاتمہ دوطرفہ تجارت کے فروغ کے لیے ناگزیر ہے۔

اس موقع پر ایرانی وزیر صنعت و تجارت ڈاکٹر محمد اتابک نے کہا کہ پاکستان اور ایران کے درمیان دیرینہ دوستانہ تعلقات موجود ہیں، جنہیں پائیدار معاشی شراکت داری میں تبدیل کرنے کی ضرورت ہے۔

انہوں نے کہا کہ دونوں ممالک تجارت کے لیے مشترکہ راہداریوں اور سہولیات کو بہتر بنانے پر توجہ دے رہے ہیں، جبکہ باہمی تجربات سے فائدہ اٹھا کر تجارت اور معیشت کو نئی بلندیوں تک پہنچایا جائے گا۔

اجلاس میں دونوں ممالک نے باہمی تعاون کو مزید وسعت دینے، سرمایہ کاری کے مواقع بڑھانے اور اقتصادی روابط کو فروغ دینے کے عزم کا بھی اظہار کیا۔