پاکستان نے سینٹرل ایشین والی بال چیمپئن شپ جیت لی، فائنل میں بنگلادیش کو اسٹریٹ سیٹس میں شکست

اسلام آباد: پاکستان والی بال ٹیم نے شاندار کارکردگی کا مظاہرہ کرتے ہوئے سینٹرل ایشین والی بال چیمپئن شپ کا ٹائٹل اپنے نام کر لیا۔ قومی ٹیم نے فائنل میں بنگلادیش کو اسٹریٹ سیٹس میں شکست دے کر تاریخ رقم کر دی۔

اسلام آباد میں کھیلے گئے فائنل میں پاکستان نے ابتدا ہی سے کھیل پر مکمل کنٹرول برقرار رکھا اور بنگلادیش کو 25-20، 25-16 اور 25-20 سے شکست دے کر چیمپئن بننے کا اعزاز حاصل کیا۔

قومی کھلاڑیوں نے بہترین ٹیم ورک، مضبوط دفاع اور جارحانہ کھیل کا شاندار مظاہرہ کرتے ہوئے حریف ٹیم کو پورے میچ کے دوران واپسی کا کوئی موقع نہیں دیا۔

سینٹرل ایشین والی بال چیمپئن شپ میں مجموعی طور پر چھ ٹیموں نے حصہ لیا، تاہم پاکستان پورے ٹورنامنٹ میں ناقابلِ شکست رہا۔ قومی ٹیم نے گروپ مرحلے سے لے کر فائنل تک مسلسل کامیابیاں حاصل کرتے ہوئے اپنی برتری ثابت کی اور ٹائٹل اپنے نام کیا۔

ٹورنامنٹ میں تیسری پوزیشن کے لیے کھیلے گئے میچ میں سری لنکا نے ازبکستان کو شکست دے کر کانسی کا تمغہ حاصل کیا۔

دریں اثنا وزیراعظم شہباز شریف نے سینٹرل ایشین والی بال چیمپئن شپ جیتنے پر قومی ٹیم کو مبارکباد دیتے ہوئے کھلاڑیوں، کوچنگ اسٹاف اور ٹیم مینجمنٹ کی شاندار کارکردگی کو سراہا۔

وزیراعظم نے اپنے پیغام میں کہا کہ قومی ٹیم نے بہترین کھیل، نظم و ضبط اور مثالی ٹیم ورک کا مظاہرہ کرتے ہوئے پاکستان کا نام روشن کیا ہے۔ انہوں نے کہا کہ ملک کے باصلاحیت نوجوان عالمی سطح پر پاکستان کی نمائندگی اور کامیابی حاصل کرنے کی بھرپور صلاحیت رکھتے ہیں۔

شہباز شریف نے اس عزم کا بھی اعادہ کیا کہ حکومت کھیلوں کے فروغ اور نوجوان کھلاڑیوں کی سرپرستی کے لیے اقدامات جاری رکھے گی، جبکہ قومی والی بال ٹیم کے لیے آئندہ بین الاقوامی مقابلوں میں مزید کامیابیوں کی نیک خواہشات کا اظہار بھی کیا۔