پیٹ کمنز کمر کے حتمی اسکین کیلئے آسٹریلیا روانہ، آئی پی ایل میں واپسی غیر یقینی

(انڈیا) رپورٹس کے مطابق پیٹ کمنز فٹنس مسائل کے باوجود آئی پی ایل ٹیم سن رائزرز حیدرآباد کو سیزن کے آغاز سے قبل جوائن کر چکے تھے اور آسٹریلیا میں ری ہیب کا عمل بھی جاری رکھے ہوئے تھے۔ بتایا گیا ہے کہ ان کا اسکین پہلے سے طے شدہ تھا جو کرکٹ آسٹریلیا کی نگرانی میں کیا جائے گا۔

ذرائع کے مطابق اگر پیٹ کمنز کو فٹ قرار دے دیا گیا تو وہ 17 اپریل کو دوبارہ سن رائزرز حیدرآباد کے اسکواڈ کو جوائن کر سکتے ہیں۔ ان کی عدم موجودگی میں ٹیم کی قیادت ایشان کشن کر رہے ہیں۔

پیٹ کمنز گزشتہ سال جولائی سے کمر کی انجری کا شکار ہیں اور اس دوران وہ صرف ایک ایشز ٹیسٹ کھیل سکے تھے۔ انہوں نے ٹی ٹوئنٹی ورلڈ کپ میں شرکت کی امید ظاہر کی تھی تاہم مکمل فٹ نہ ہونے کے باعث وہ ایونٹ سے بھی باہر ہوگئے تھے۔

پیٹ کمنز نے آئی پی ایل سے قبل کہا تھا کہ وہ ٹورنامنٹ کے دوسرے مرحلے میں واپسی کا ارادہ رکھتے ہیں، اسی مقصد کے تحت وہ باقاعدگی سے نیٹس میں بولنگ کی پریکٹس بھی کر رہے تھے۔