حکومت کا عوام کو معمولی ریلیف، پٹرول اور ڈیزل کی قیمت میں ایک روپے 97 پیسے فی لیٹر کمی

اسلام آباد: وفاقی حکومت نے عوام کو معمولی ریلیف دیتے ہوئے پٹرولیم مصنوعات کی قیمتوں میں کمی کا اعلان کر دیا ہے۔ پٹرولیم ڈویژن کی جانب سے جاری کردہ نوٹیفکیشن کے مطابق پٹرول اور ہائی اسپیڈ ڈیزل دونوں کی قیمت میں ایک روپے 97 پیسے فی لیٹر کمی کی گئی ہے۔

اعلامیے کے مطابق کمی کے بعد پٹرول کی نئی قیمت 297 روپے 53 پیسے فی لیٹر مقرر کر دی گئی ہے، جبکہ ہائی اسپیڈ ڈیزل کی نئی قیمت 309 روپے 50 پیسے فی لیٹر ہوگی۔

پٹرولیم ڈویژن کا کہنا ہے کہ نئی قیمتوں کا اطلاق رات 12 بجے سے کر دیا گیا ہے، جس کے بعد ملک بھر میں تمام پٹرول پمپس پر نئی قیمتیں نافذ العمل ہوں گی۔

واضح رہے کہ حکومت ہر پندرہ روز بعد عالمی منڈی میں خام تیل کی قیمتوں، درآمدی لاگت، ٹیکسز اور دیگر عوامل کو مدنظر رکھتے ہوئے پٹرولیم مصنوعات کی قیمتوں کا جائزہ لے کر نئی قیمتوں کا اعلان کرتی ہے۔ حالیہ فیصلے کے تحت عوام کو پٹرول اور ڈیزل دونوں پر معمولی ریلیف فراہم کیا گیا ہے۔