مکہ دفاعی معاہدے کے مثبت نتائج سامنے آ رہے ہیں، ترک صدر

ترک صدر رجب طیب اردوان نے کہا ہے کہ ترکیہ، سعودی عرب اور پاکستان کے درمیان ہونے والے مکہ دفاعی معاہدے کے مثبت نتائج سامنے آنا شروع ہوگئے ہیں، جبکہ تینوں ممالک نے معاہدے کے ذریعے اسلامی دنیا کو اہم پیغام دیا ہے۔

رجب طیب اردوان کا کہنا تھا کہ ترکیہ، سعودی عرب اور پاکستان نے مکہ معاہدے کے تحت مشترکہ قدم اٹھایا ہے، جو اسلامی دنیا کے لیے ایک اہم پیغام ہے۔ انہوں نے کہا کہ موجودہ علاقائی صورتحال میں تینوں ممالک کا باہمی تعاون اہمیت رکھتا ہے۔

ترک صدر نے کہا کہ ترکیہ خطے کی موجودہ صورتحال کو معمولی سمجھ کر نظر انداز نہیں کرسکتا۔ انقرہ آبنائے ہرمز اور خلیج کی صورتحال پر گہری نظر رکھے ہوئے ہے۔

انہوں نے مزید کہا کہ اسلامی دنیا کو مختلف علاقوں میں سنگین مشکلات کا سامنا ہے، ایسے حالات میں خطے کے ممالک کے درمیان تعاون اور یکجہتی کی ضرورت پہلے سے زیادہ بڑھ گئی ہے۔

رجب طیب اردوان نے عزم ظاہر کیا کہ ترکیہ خطے کو درپیش مشکلات پر قابو پانے کے لیے اپنا کردار ادا کرتا رہے گا اور علاقائی امن و استحکام کے لیے کوششیں جاری رکھے گا۔

ترک صدر کے مطابق موجودہ حالات میں اسلامی ممالک کے درمیان مشترکہ اقدامات اور تعاون خطے کو درپیش چیلنجز سے نمٹنے میں اہم کردار ادا کرسکتے ہیں۔