پیپلز پارٹی نے بلاول بھٹو زرداری کو جوڈیشل کمیشن کے لیے نامزد کردیا

اسلام آباد: پاکستان پیپلز پارٹی نے چیئرمین بلاول بھٹو زرداری کو جوڈیشل کمیشن آف پاکستان کے لیے نامزد کردیا ہے۔ ذرائع کے مطابق بلاول بھٹو کی نامزدگی کا باضابطہ نوٹیفکیشن جلد جاری کیے جانے کا امکان ہے۔

یہ پیش رفت پیپلز پارٹی کے سینیٹر فاروق ایچ نائیک کے جوڈیشل کمیشن کی رکنیت سے استعفے کے بعد سامنے آئی ہے۔ فاروق ایچ نائیک نے ذاتی وجوہات کی بنا پر استعفیٰ دینے کی تصدیق کی تھی۔ مسلم لیگ ن کے رکن شیخ آفتاب احمد بھی جوڈیشل کمیشن کی رکنیت سے استعفیٰ دے چکے ہیں۔

ذرائع کے مطابق جوڈیشل کمیشن کے ارکان کی نامزدگی کا عمل جلد مکمل کیا جائے گا، جبکہ سینیٹ اور قومی اسمبلی سے بھی نئے ارکان کی نامزدگیاں متوقع ہیں۔

جوڈیشل کمیشن آف پاکستان اعلیٰ عدلیہ میں ججز کی تقرری سے متعلق اہم آئینی فورم ہے۔

ذرائع کے مطابق موجودہ ارکان کی دو سالہ مدت مکمل ہونے کے بعد نئی نامزدگیاں معمول کی کارروائی کا حصہ ہیں۔ بلاول بھٹو کی نامزدگی کے بعد پیپلز پارٹی کی جوڈیشل کمیشن میں نمائندگی دوبارہ قائم ہوجائے گی۔