اسلام آباد میں طالبہ لائبہ کی خودکشی کا وزیراعظم نے نوٹس لے لیا، مبینہ فراڈ میں ملوث ٹریول ایجنٹ کی گرفتاری کا حکم

اسلام آباد: وزیراعظم شہباز شریف نے اسلام آباد میں 24 سالہ طالبہ لائبہ کی خودکشی کے افسوس ناک واقعے کا نوٹس لیتے ہوئے مبینہ فراڈ میں ملوث ٹریول ایجنٹ کو فوری گرفتار کرنے کی ہدایت کر دی ہے۔ ایف آئی اے نے ملزم کی ابتدائی شناخت کر لی ہے اور اس کا نام اسٹاپ لسٹ میں شامل کر دیا گیا ہے، جبکہ فراڈ میں ایک خاتون کے مبینہ طور پر ملوث ہونے کا انکشاف بھی ہوا ہے۔

ایف آئی اے حکام کے مطابق موبائل فون ڈیٹا کی مدد سے مرکزی ملزم نعمان کی شناخت کی گئی ہے۔ ملزم کی گرفتاری کے لیے کوششیں شروع کر دی گئی ہیں۔ ابتدائی اطلاعات کے مطابق ملزم نے خود کو سپریم کورٹ کا اہلکار ظاہر کرکے طالبہ کو دھوکا دیا اور امریکہ جانے کے لیے جعلی دستاویزات تیار کیں۔ حکام کے مطابق اس معاملے میں ایک خاتون کے ملوث ہونے کے پہلو کا بھی جائزہ لیا جا رہا ہے۔

وزیراعظم آفس کے ترجمان کے مطابق آئی جی اسلام آباد اور چیف کمشنر اسلام آباد نے وزیراعظم شہباز شریف سے ملاقات کی، جس میں انہیں واقعے سے متعلق آگاہ کیا گیا۔ وزیراعظم نے مبینہ طور پر فراڈ کرنے والے ملزم کی فوری گرفتاری اور معاملے کی تحقیقات کی ہدایت کی۔

دوسری جانب لائبہ کے اہلخانہ شدید غم اور صدمے سے دوچار ہیں۔ اطلاعات کے مطابق طالبہ نے امریکہ جانے کی غرض سے مبینہ ٹریول ایجنٹ کو 50 لاکھ روپے ادا کیے تھے۔ اس رقم کا انتظام کرنے کے لیے انہوں نے اپنے والد کا پلاٹ اور والدہ کے زیورات بھی فروخت کیے تھے۔

لائبہ اسلامک انٹرنیشنل یونیورسٹی سے بی ایس فزکس میں گولڈ میڈلسٹ تھیں۔ بہتر مستقبل کے خواب لیے امریکہ جانے کی خواہش رکھنے والی طالبہ مبینہ طور پر جعلی دستاویزات اور فراڈ کا شکار ہوئیں۔ اطلاعات کے مطابق انہوں نے گزشتہ روز گلے میں پھندا ڈال کر خودکشی کر لی۔

واقعے نے اہلخانہ کو گہرے صدمے سے دوچار کر دیا ہے، جبکہ متعلقہ اداروں کی جانب سے ملزم کی گرفتاری اور فراڈ کے تمام پہلوؤں کی تحقیقات جاری ہیں۔