پشاور زلمی پی ایس ایل 11 کی چیمپئن,فائنل میںحیدرآباد کنگزمین کو شکست

لاہور:قذافی اسٹیڈیم لاہور میں کھیلے گئے فائنل میں حیدرآباد کنگزمین کی ٹیم 18 اوورز میں 129 رنز بنا کر آؤٹ ہوگئی۔ ہدف کے تعاقب میں پشاور زلمی نے 130 رنز 15.2 اوورز میں حاصل کر لیے۔

زلمی کی جانب سے ایرون ہارڈی نے 56 اور عبدالصمد نے 48 رنز کی عمدہ اننگز کھیلیں، جبکہ بابراعظم صفر پر آؤٹ ہوئے، محمد حارث 6 اور کوشال مینڈس 9 رنز بنا سکے۔ کنگزمین کے بولرمحمد علی نے 3 وکٹیں حاصل کیں۔

حیدرآباد کنگزمین کی جانب سے کپتان مارنس لبوشین نے 20 رنز کی مزاحمتی اننگز کھیلی جبکہ صائم ایوب نے 54 رنز بنا کر ٹیم کو سہارا دینے کی کوشش کی۔

باؤلنگ میں ایرون ہارڈی نے تباہ کن کارکردگی دکھاتے ہوئے 4 وکٹیں حاصل کیں جبکہ ناہید رانا نے 2 کھلاڑیوں کو آؤٹ کیا۔ سفیان مقیم اور محمد باسط نے بھی مؤثر باؤلنگ کی۔

ٹاس کے موقع پر کپتان بابر اعظم نے کہا کہ لاہور میں ہمیشہ زبردست سپورٹ ملی ہے اور ٹیم فینز کو انٹرٹین کرنے کی کوشش کرے گی، جبکہ مدمقابل کپتان مارنس لبوشین نے فائنل کھیلنے پر خوشی کا اظہار کیا۔

میچ سے قبل رنگا رنگ اختتامی تقریب منعقد ہوئی جس میں معروف فنکاروں نے پرفارمنس دی۔ چیئرمین پی سی بی محسن نقوی اور متعدد وفاقی وزرا بھی تقریب میں شریک ہوئے۔

شہباز شریف بھی فائنل دیکھنے اسٹیڈیم پہنچے، انہوں نے دونوں ٹیموں کے کھلاڑیوں سے ملاقات کی اور ان کی کارکردگی کو سراہا۔

پی سی بی کے مطابق فائنل میچ کے تمام ٹکٹس فروخت ہو چکے تھے اور قذافی اسٹیڈیم مکمل طور پر ہاؤس فل رہا۔ تاہم محکمہ موسمیات نے میچ کے دوران بارش اور تیز آندھی کا امکان ظاہر کیا تھا۔