پنجاب حکومت نے 27 ستمبر سے موبائل اور انٹرنیٹ سروسز کی بندش کی درخواست کردی

لاہور: پنجاب حکومت نے وفاق سے 27 ستمبر سے مخصوص علاقوں میں موبائل فون اور انٹرنیٹ سروسز بند کرنے یا سگنلز کو ڈاؤن گریڈ کرنے کی درخواست کردی۔

ذرائع کے مطابق محکمہ داخلہ پنجاب نے وفاقی حکومت کو خط لکھ کر 27 ستمبر سے موبائل اور انٹرنیٹ سروسز کی بندش جبکہ بعض علاقوں میں سگنلز کمزور کرنے کی درخواست کی ہے۔

ذرائع کا کہنا ہے کہ پنجاب حکومت نے ضلع اٹک اور راولپنڈی کے مخصوص علاقوں میں بھی موبائل اور انٹرنیٹ سروسز کی بندش کی درخواست کی ہے۔

ذرائع کے مطابق یہ درخواست امن و امان کی متوقع صورتحال کے پیش نظر کی گئی ہے۔

واضح رہے کہ تحریک انصاف نے 27 ستمبر کو اسلام آباد کی جانب لانگ مارچ کا اعلان کر رکھا ہے۔ مارچ کے پیش نظر اسلام آباد آنے والے راستوں پر کنٹینرز لگائے جا رہے ہیں، جبکہ پنجاب بھر میں دفعہ 144 بھی نافذ کردی گئی ہے۔