پنجاب کے وزیر صنعت کی کینیڈین کینولا کونسل کے حکام سے ملاقات، تجارت و سرمایہ کاری بڑھانے پر اتفاق

ٹورنٹو: پنجاب کے وزیر صنعت، تجارت و سرمایہ کاری شفے حسین نے کاروباری وفد کے ہمراہ ٹورنٹو میں کینولا کونسل آف کینیڈا کے صدر اور چیف ایگزیکٹو آفیسر کرس ڈیوسن سے ملاقات کی۔

ملاقات کے دوران پاکستان اور کینیڈا کے درمیان تجارت اور سرمایہ کاری کے فروغ کے مختلف امکانات پر تفصیلی تبادلہ خیال کیا گیا۔ خاص طور پر آئل سیڈز، زرعی خوراک اور زرعی صنعتی شعبوں میں تعاون بڑھانے کے مواقع کا جائزہ لیا گیا۔

فریقین نے دونوں ممالک کے درمیان موجودہ تجارتی تعاون کو مزید مضبوط بنانے پر اتفاق کیا۔ اس موقع پر باہمی دلچسپی کے مختلف شعبوں میں تعاون کو وسعت دینے اور کاروباری روابط بڑھانے کی ضرورت پر بھی زور دیا گیا۔

ملاقات میں پنجاب میں زرعی و صنعتی شعبوں میں سرمایہ کاری کے امکانات اور کینیڈین کاروباری اداروں کے ساتھ تعاون کو فروغ دینے سے متعلق امور بھی زیر بحث آئے۔