برمنگھم ٹیسٹ: رضا اللہ کا دھواں دار ڈیبیو، تیز ترین نصف سنچری سمیت کئی ریکارڈز قائم

برمنگھم ٹیسٹ میں پاکستان کے فاسٹ بولر رضا اللہ نے شاندار بیٹنگ کا مظاہرہ کرتے ہوئے نہ صرف پاکستان کو اننگز کی شکست سے بچایا بلکہ ٹیسٹ ڈیبیو پر کئی ریکارڈز بھی قائم کر دیے۔

انگلینڈ کے خلاف دوسری اننگز میں نمبر 9 پر بیٹنگ کرتے ہوئے رضا اللہ نے صرف 63 گیندوں پر 81 رنز کی جارحانہ اننگز کھیلی اور پاکستان کی برتری 130 رنز تک پہنچانے میں اہم کردار ادا کیا۔

رضا اللہ نے اپنی اننگز میں 9 چھکے لگائے اور ٹیسٹ ڈیبیو پر سب سے زیادہ چھکے لگانے کا عالمی ریکارڈ برابر کردیا۔ ان کے ساتھ محمد عباس نے بھی 42 رنز کی اننگز میں 2 چھکے لگائے۔ یوں ٹیسٹ کرکٹ میں پہلی مرتبہ نمبر 9 سے 11 تک کے بیٹرز نے ایک اننگز میں فاسٹ بولرز کی جانب سے مجموعی طور پر 10 چھکے لگائے۔

رضا اللہ نے انگلینڈ کے خلاف 43 گیندوں پر نصف سنچری مکمل کی، جس کے ساتھ وہ ٹیسٹ ڈیبیو پر تیز ترین نصف سنچری بنانے والے پاکستانی بیٹر بن گئے۔ اس سے قبل یہ ریکارڈ فہیم اشرف کے پاس تھا، جنہوں نے 2018 میں ڈیبیو پر 52 گیندوں پر نصف سنچری بنائی تھی۔

رضا اللہ نے گزشتہ 15 سال کے دوران ایک اننگز میں فاسٹ بولرز کو 8 چھکے لگانے والے پہلے پاکستانی بیٹر ہونے کا اعزاز بھی حاصل کیا۔

برمنگھم ٹیسٹ کی پہلی اننگز میں رضا اللہ نے 11 جبکہ دوسری اننگز میں 81 رنز بنائے۔ یوں وہ ٹیسٹ ڈیبیو پر انگلینڈ کے خلاف سب سے زیادہ رنز بنانے والے پاکستانی بیٹر بھی بن گئے۔

پاکستان دوسری اننگز میں 449 رنز بنا کر آؤٹ ہوا، جس کے بعد انگلینڈ کو میچ جیتنے کے لیے 130 رنز کا ہدف ملا۔ میزبان انگلینڈ کو تین ٹیسٹ میچز کی سیریز میں پہلے ہی 2-0 کی فیصلہ کن برتری حاصل ہے۔