تحریک انصاف کے ساتھ دوبارہ مذاکرات ہوسکتے ہیں: رانا ثناء اللہ

اسلام آباد: حکومت اور اپوزیشن کے درمیان ایک بار پھر مذاکرات کی راہ ہموار ہونے لگی ہے۔ وزیراعظم کے مشیر اور مسلم لیگ ن کے رہنما رانا ثناء اللہ نے کہا ہے کہ تحریک انصاف کے ساتھ دوبارہ مذاکرات ہوسکتے ہیں۔

رانا ثناء اللہ نے کہا کہ حکومت اور اپوزیشن کے درمیان رابطے پہلے بھی موجود تھے اور اب بھی جاری ہیں۔

رانا ثناء اللہ نے کہا کہ عسکری قیادت، سیاسی قیادت اور وفاقی حکومت کا فیصلہ ہے کہ پاکستان پر مسلط کی گئی دہشتگردی کی جنگ کو حتمی نتیجے تک پہنچایا جائے۔

انہوں نے کہا کہ خیبرپختونخوا کی حکومت کو بھی دہشتگردی کے خلاف پالیسی اور جاری آپریشن میں اپنا کردار ادا کرنا ہوگا۔

وزیراعظم کے مشیر کے مطابق اگر اپوزیشن کی جانب سے دہشتگردی کے خلاف جنگ میں مثبت پیش رفت کی یقین دہانی کرائی جائے تو حکومت تحریک انصاف کے ساتھ دوبارہ مذاکرات کی میز پر بیٹھ سکتی ہے۔

دوسری جانب تحریک انصاف کے رہنما اسد قیصر نے کہا ہے کہ پارٹی دوبارہ مذاکرات کے لیے تیار ہے۔

اسد قیصر کا کہنا تھا کہ اب گیند حکومت کے کورٹ میں ہے اور تحریک انصاف کے مطالبات کا ڈرافٹ حکومت کے پاس موجود ہے۔

انہوں نے کہا کہ اگر حکومت مذاکرات کے لیے سنجیدہ ہوگی تو تحریک انصاف بھی مذاکرات کے لیے تیار ہے۔

حکومت اور تحریک انصاف کے حالیہ بیانات کے بعد سیاسی مذاکرات کی بحالی کے امکانات ایک بار پھر زیر بحث آگئے ہیں، تاہم مذاکرات کے باقاعدہ آغاز اور ایجنڈے سے متعلق حتمی پیش رفت کا انتظار ہے۔