معروف بھارتی اداکار نانا پاٹیکر 75 برس کی عمر میں انتقال کر گئے

ممبئی: بالی ووڈ اور مراٹھی فلموں کے معروف اداکار و فلمساز نانا پاٹیکر 75 برس کی عمر میں انتقال کر گئے۔ وہ جمعرات کی صبح گوا میں اپنی رہائش گاہ پر دل کا دورہ پڑنے کے بعد بے ہوش ہوگئے تھے۔

بھارتی میڈیا کے مطابق نانا پاٹیکر کو تشویش ناک حالت میں گوا کے منی پال اسپتال منتقل کیا گیا، جہاں ڈاکٹروں نے تقریباً 45 منٹ تک مسلسل سی پی آر کے ذریعے انہیں بچانے کی کوشش کی، تاہم وہ جانبر نہ ہوسکے۔ انہیں صبح تقریباً 5 بج کر 20 منٹ پر مردہ قرار دیا گیا۔

نانا پاٹیکر نے 1978 میں فلم ’گمن‘ سے اپنے فلمی کیریئر کا آغاز کیا اور تقریباً پانچ دہائیوں تک بھارتی سنیما سے وابستہ رہے۔ وہ ہندی اور مراٹھی فلموں میں اپنی منفرد اداکاری اور جاندار مکالموں کی ادائیگی کے لیے شہرت رکھتے تھے۔

انہوں نے ’پرندہ‘، ’کرانتی ویر‘، ’ویلکم‘، ’اب تک چھپن‘ اور دیگر متعدد کامیاب فلموں میں اہم کردار ادا کیے۔ انہیں اپنی اداکاری پر تین نیشنل فلم ایوارڈز سے نوازا گیا، جبکہ 2013 میں انہیں بھارتی حکومت کی جانب سے پدم شری اعزاز بھی دیا گیا۔

نانا پاٹیکر کے انتقال کی خبر سامنے آنے کے بعد بھارتی فلم انڈسٹری میں سوگ کی فضا ہے اور فلمی شخصیات سمیت مختلف حلقوں کی جانب سے انہیں خراجِ عقیدت پیش کیا جارہا ہے۔