سلمان خان کا بیڈروم میں نادیدہ قوت کی موجودگی کا انکشاف، بتیاں خود جلنے بجھنے لگتی تھیں

ممبئی: بالی وڈ کے معروف اداکار سلمان خان نے اپنے بیڈروم میں پراسرار واقعات پیش آنے کا انکشاف کرتے ہوئے بتایا ہے کہ انہیں طویل عرصے تک اپنے کمرے میں کسی نادیدہ وجود کی موجودگی کا احساس ہوتا رہا۔

ڈائریکٹر اور پروڈیوسر کرن جوہر کے پروگرام میں گفتگو کرتے ہوئے سلمان خان نے بتایا کہ وہ اپنے بیڈروم میں کبھی خود کو مکمل طور پر اکیلا محسوس نہیں کرتے تھے۔ ان کے بقول، انہیں وہاں کسی ایسے شخص کی موجودگی کا احساس ہوتا تھا جسے انہوں نے کبھی دیکھا نہیں تھا، بلکہ اس کے بارے میں صرف سنا تھا۔

بتیاں خود جلنے بجھنے لگتیں، الماریاں بھی کھل جاتیں

سلمان خان نے گفتگو کے دوران بتایا کہ جب بھی وہ اپنے کمرے سے باہر نکلتے تو بتیاں خود بخود جلنے اور بجھنے لگتیں، الماریاں کھل جاتیں اور میوزک سسٹم بھی خود ہی چل پڑتا تھا۔

اداکار کے مطابق، جب وہ باتھ روم میں ہوتے تو انہیں باہر کسی کی موجودگی محسوس ہوتی، جیسے کوئی الماریوں کے دروازے کھول رہا ہو۔

کیا کمرے میں جنات تھے؟

کرن جوہر نے سلمان خان سے سوال کیا کہ کیا انہیں لگتا تھا کہ ان کے کمرے میں جنات موجود ہیں؟

اس پر سلمان خان نے کہا کہ ضروری نہیں کہ وہ جنات ہی ہوں، تاہم انہیں اپنے اردگرد کسی نادیدہ وجود کی موجودگی کا احساس ضرور ہوتا تھا۔

خوفزدہ نہیں ہوئے سلمان خان

اداکار نے مزید کہا کہ وہ ان واقعات سے خوفزدہ نہیں ہوئے، کیونکہ ان کے مطابق اس پراسرار موجودگی سے انہیں کبھی کوئی نقصان نہیں پہنچا۔

سلمان خان نے گفتگو کے دوران مزاحیہ انداز بھی اپنایا اور کہا کہ ان کی اس نادیدہ وجود سے صرف یہی درخواست تھی کہ اگر وہ واقعی کوئی خوبصورت عورت ہے تو ان کے سامنے آ کر ظاہر ہو جائے۔

سلمان خان کی جانب سے بیان کیا گیا یہ دلچسپ واقعہ ان کے مداحوں کے لیے حیرت اور تجسس کا باعث بن سکتا ہے۔ تاہم، یہ واقعات اداکار کا ذاتی بیان ہیں اور ان کی کسی مافوق الفطرت وجہ کی آزادانہ تصدیق سامنے نہیں آئی۔