سیف علی خان نے گھر پر جان لیوا حملے کی خوفناک رات سے متعلق خاموشی توڑ دی

(ممبئی) بالی ووڈ کے معروف اداکار سیف علی خان نے اپنے گھر پر ہونے والے جان لیوا چاقو حملے کے ایک سال سے زائد عرصے بعد پہلی بار اس خوفناک رات سے متعلق تفصیلات شیئر کرتے ہوئے کہا ہے کہ حملہ آور کو معاف کرنا ان کے لیے انتہائی مشکل ہے، کیونکہ اس نے نہ صرف ان پر حملہ کیا بلکہ ان کے کمسن بیٹے جہانگیر (جے) کو بھی نقصان پہنچانے کی کوشش کی۔

ایک حالیہ انٹرویو میں سیف علی خان نے بتایا کہ جنوری 2025 میں ممبئی کے علاقے باندرہ میں واقع ان کی رہائش گاہ میں ایک شخص داخل ہوا، جس نے ان پر متعدد بار چاقو سے حملہ کیا اور انہیں شدید زخمی کر دیا۔

اداکار کے مطابق اس واقعے کا سب سے تکلیف دہ پہلو یہ تھا کہ حملہ آور نے ان کے بیٹے جے کو بھی نقصان پہنچانے کی کوشش کی، جس کی وجہ سے وہ آج تک اس شخص کو معاف نہیں کر سکے۔

انہوں نے کہا کہ وہ اپنی زندگی میں آگے بڑھنے کی کوشش کر رہے ہیں، تاہم اس رات کی یادیں آج بھی ان کے ذہن میں تازہ ہیں۔ ان کے بقول وقت نے جسمانی زخم تو بھر دیے ہیں، لیکن اس واقعے کے ذہنی اور جذباتی اثرات اب بھی باقی ہیں۔

یاد رہے کہ 16 جنوری 2025 کو سیف علی خان پر ان کے گھر میں گھس کر چاقو سے حملہ کیا گیا تھا، جس کے نتیجے میں انہیں چھ زخم آئے تھے۔ ایک زخم ریڑھ کی ہڈی کے انتہائی قریب تھا، جس کے باعث انہیں فوری طور پر اسپتال منتقل کیا گیا جہاں ان کی ہنگامی سرجری کی گئی۔ بعد ازاں پولیس نے ملزم کو گرفتار کر لیا تھا۔

سیف علی خان کے تازہ بیان کے بعد یہ افسوسناک واقعہ ایک بار پھر خبروں کی زینت بن گیا ہے، جبکہ ان کے مداح اداکار کی مکمل صحت یابی، ذہنی سکون اور محفوظ زندگی کے لیے نیک خواہشات کا اظہار کر رہے ہیں۔