کالعدم ایکشن کمیٹی کے عناصر تاریخ سے ناواقف یا کسی ایجنڈے پر عمل پیرا ہیں: سردار مسعود خان

مظفرآباد: آزاد کشمیر کے سابق صدر سردار مسعود خان نے کہا ہے کہ کشمیر کی آزادی اور پاکستان سے الحاق کے لیے اس دھرتی کے لوگوں نے بے شمار قربانیاں دی ہیں، جبکہ کالعدم جوائنٹ عوامی ایکشن کمیٹی میں شامل بعض عناصر یا تو تاریخ سے ناواقف ہیں یا کسی مخصوص ایجنڈے پر عمل کر رہے ہیں۔

اپنے بیان میں سردار مسعود خان نے کہا کہ اگر سردار محمد ابراہیم خان کی قیادت نہ ہوتی تو کوہالہ سمیت آزاد کشمیر کے متعدد علاقوں پر بھارتی افواج کا قبضہ ہوتا۔ انہوں نے کہا کہ سردار محمد عبدالقیوم خان نے اپنی پوری زندگی تحریک آزادی کشمیر اور کشمیری عوام کے حقِ خودارادیت کی جدوجہد کے لیے وقف کیے رکھی۔

انہوں نے کہا کہ تحریک آزادی کشمیر کی تاریخ کو مسخ کرنے یا قومی رہنماؤں کی قربانیوں کو نظر انداز کرنے کی کوششیں حقیقت کو تبدیل نہیں کر سکتیں۔

یہ بیان ایسے وقت میں سامنے آیا ہے جب اس سے قبل کالعدم جوائنٹ عوامی ایکشن کمیٹی کی جانب سے جاری ایک بیان میں دعویٰ کیا گیا تھا کہ سردار محمد ابراہیم اور سردار عبدالقیوم جیسے رہنماؤں کے فیصلوں کی سزا آج کشمیری عوام بھگت رہے ہیں۔ بیان میں ان رہنماؤں پر ریاست کی تقسیم کا الزام بھی عائد کیا گیا تھا۔

سردار مسعود خان نے ان الزامات کو مسترد کرتے ہوئے کہا کہ تاریخ اور حقائق کو مسخ کرنے کی ہر کوشش ناکام ہوگی اور کشمیری عوام اپنی جدوجہد، قربانیوں اور قومی رہنماؤں کے کردار سے بخوبی آگاہ ہیں۔