سرگودھا میں گھر میں گھس کر خاتون سے مبینہ اجتماعی زیادتی، 4 ملزمان کے خلاف مقدمہ درج

سرگودھا کے چک 97 شمالی میں گھر میں گھس کر خاتون سے مبینہ اجتماعی زیادتی کا واقعہ، تھانہ صدر پولیس نے چار ملزمان کے خلاف مقدمہ درج کرکے تلاش شروع کردی، متاثرہ خاتون کا میڈیکل جاری
سرگودھا: پنجاب کے شہر سرگودھا کے نواحی علاقے چک 97 شمالی میں گھر میں گھس کر خاتون سے مبینہ اجتماعی زیادتی کا افسوسناک واقعہ پیش آیا ہے، جس پر پولیس نے چار ملزمان کے خلاف مقدمہ درج کرکے ان کی تلاش شروع کردی ہے۔
پولیس کے مطابق چار مسلح افراد مبینہ طور پر گھر میں داخل ہوئے، اس وقت خاتون کا شوہر بچوں سمیت گھر سے باہر ایک ڈیرے پر موجود تھا۔
ابتدائی اطلاعات کے مطابق ملزمان میں سے ایک شخص اسلحہ لے کر پہرہ دیتا رہا جبکہ دیگر تین ملزمان نے مبینہ طور پر خاتون کو اجتماعی زیادتی کا نشانہ بنایا اور واردات کے بعد موقع سے فرار ہوگئے۔
واقعے کی اطلاع ملنے پر تھانہ صدر پولیس نے کارروائی کرتے ہوئے چاروں نامزد ملزمان کے خلاف مقدمہ درج کرلیا ہے۔
پولیس حکام کے مطابق ملزمان کی گرفتاری کے لیے تلاش جاری ہے جبکہ متاثرہ خاتون کا طبی معائنہ بھی کرایا جا رہا ہے تاکہ واقعے سے متعلق شواہد اکٹھے کیے جا سکیں۔
پولیس کا کہنا ہے کہ واقعے کی مزید تحقیقات جاری ہیں اور ملزمان کی گرفتاری کے لیے کوششیں کی جا رہی ہیں۔
شائع ہوا: 22 نومبر، 2026 کو 05:09 AM
آخری تدوین: 22 نومبر، 2026



